Traduzione in mòcheno
S tuat au der bando 2024 as gip gilt en de oubergamoa’ kultural projektn
No der Oa’neprotokoll as de lokalzuazoln hòts 500 tausnt euro vort galeik ver de lokalfinanz
[Mòcheno] Unterstitzn pet zuazoln de oubergamoa’ kultural projektn as hom abia rif der sèll za mòchen naia lokal sistem, mòchen netz van pahalter ver za gem en bèrt ont versterchern de kultural, sozial ont birtschòft òrbetn as de lòntschòft: der doi ist der rif va mosnemm va de provinzaljunta as hòt se zòmmtroffen en vraita as de 17 van moi, vourtschbunnen van vicepresident ont asesor va de kultur as tuat u’nemmen der òllgamoa’ bando ver en 2024 as keart en de trentinische lokal innricht ont paschraip de virm ver za kriang de paitrong. Der unterstitz ist tsechen en provinzalgasetz iber en de kulturalnaiekaitn ont, asou abia as sok der Oa’neprotokoll va de lokalfinanz, der leik en gònzn 500 tausnt euro ver en doi jor.
Asou abia as hòt derklort der asesor, s mosnemm billt giltn de kultural pahalter, material ont immaterial, abia strategesche punkt van lokal enviregea’ turch an regiar ont an reklam as guat gea’ ver de identitet oder ver en lòng sechen iber en de grenzn aa. Zentral elementn sai’ de zòmmòrbet pet de òndern innrichtn - van turismus, va de birtschòft, van welfare, va de umbèlt, va de lear-didaktik - ont de vourtschbinn va mearer kultural naikaitn no en de neat van òlla de schòrt lait as prauchen s, asou as a guata kultural opfer gem kimmp en de sèlln as bea’ne prauchen de kultur.
S barn vourtrong kemmen meing kultural projektn van Tolgamoa’schòftn oder van Gamoa’n, ver projektn as va mearera Gamoa’n gamòcht kemmen, oder as va lai oa’na van doin Gamoa’n envirtrong kemmen ober de ziachen inn mearer òllgamoa’n oder privatn as sai’ va mearer lander, oder bou as hòt an ouberòllgamoa’, oder bou as kemmen gamòcht lokal netzn as de sistem van Trentinische bibliotek.
De vrog va paitrog miast kemmen vourstellt en Dinst van kultural Òrbetn, tschickt turch de elektronesche zertifikat post as de Pec: serv.attcult@pec.provincia.tn.it, oder ver interoperabilitet Pitre, en de draisk to derno van ausdruck van Bando as de istituzionl sait internet ont almen der to vouraus as u’vongen de òrbetn ver de beil as men de vrog mòcht. De vrogkòrt mu’ kemmen oarganommen va de sait va de PAT asn link https://www.provincia.tn.it/Documenti-e-dati/Modulistica. En vòll as der projekt kimmp vourstellt va mearer gamoa’n, de vrog miast kemmen vourstellt van a gamoa’ as mòcht va ibergeber van òlla. De òndern as toalnemmen miasn, ver za verliarn nèt der paitrog, unterstea’ en diziplinar van Trentinische Eco-eventnstempl.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(cdt)
Immagini
