Per l President de l’Euregio e de la Provinzia autonoma de Busan l Recognosciment Joegn Enrescidores Euregio l é jà n travèrt per l’Euregio Tirol-Sudtirol-Trentin: poder didèr i joegn che se dèsc ju te n setor, chel de la enrescida, fondamentèl per l davegnir, te chel che i raions i se dèsc ju jà da n trat de temp.
Apede, l argoment tout ca chest an te chel che i joegn enrescidors cogn desmostrèr sia capazitèdes, l’inteligenza artifizièla, l fèsc acioche l Recognosciment l sie amò più enteressant e de emportanza.
Per l President de la Provinzia autonoma de Trent, l Recognosciment l é na oportunità de gran valor per i joegn enrescidores, per sie luirer che deida n muie l svilup de sistemes inovatives per ge fèr front a la endesfides che i raions se met dant. Didèr l barat de cognoscenzes e de idees sorafora i confins l é segur na vida de concretisèr ence chel che l é vegnù fora dal G7, stat da pech a Trent belapontin en cont al argoment de l’inteligenza artifizièla, per chest l augurie l é che tenc joegn i sie enteressé a tor pèrt a chesta neva edizion.
Per l president del land Tirol l argoment de l’inteligenza artifizièla l é de gran enteres e l é aprijià da la jent, ma l fèsc ence cruzièr e tema. L é pec i argomenc olache la oportunitèdes e i pericoi i é coscita apede, desche per chel, che revèrda l’IA. L svilup tecnologich no l é mai stat coscita dinamich e spedient desche chel de l’IA. Tel chèder del Recognosciment Joegn Enrescidores Euregio 2024 se vel donca ge dèr luster ai joegn enrescidores che laora per l svilup tel ciamp de l’inteligenza artifizièla.
L’IA la cogn vegnir amò svilupèda, classifichèda e analisèda da la scienza, a na vida che ence i politics posse endrezèr la normes, la regoles e i limic. L envit l se ouc donca a duc chi che à enteres a portèr dant sie lurieres de enrescida en cont a l argoemnt de l’IA. I partecipanc i podarà ge dèr n emportant contribut a duta l’Euregio e i podarà se baratèr idees con scienziac de nonzech tel chèder del Recognosciment Joegn Enrescidores Euregio.
L president de la Cambra de Comerz de Busan l recorda che l’economia la fossa ceta zenza la enrescida, percheche chesta l é la base per l svilup de neva idees, tecnologies e strategies. L’enrescida donca no la met ensema demò l prejent, ma enc el davegnir e la deida a na vida fondamentèla ence l jir inant de la sozietà. Per la Cambra de comerz l Recognosciment Joegn Enrescidores de l’Euregio l é na oportunità de didèr chest prozes de crescimonia e sotrissèr sia emportanza.
L president de la CCIAA de Trent l sotrissea che i joegn enrescidores con sia curiosità, ressoluzion e competenza, i é la forza de l’inovazion e del mudament. L é de obligh, desche istituzions e imprenditores, ge sporjer l didament che ocor per fèr acioche i posse fèr vegnir fora duta sia capazitèdes. Per chesta rejon l Recognosciment Joegn Enrescidores de l’Euregio l é na ocajion preziousa per meter en esser coleamenc staifes anter l mond de la enrescida e chel de la firmes tel chèder internazionèl che sporc didament e valorisea l sparpagnament de la cognoscenzes.
Per la presidenta de la Cambra de Comerz del Tirol, che la spera che vegne manà ite tropa candidatures per l Recognosciment , l é emportant didèr l’inovazion e la enrescida te l’Euregio Tirol-Sudtirol-Trentin, percheche l’inovazion la ne fèsc esser forc con pech. La Cambra de Comerz del Tirol, la deida i imprenditores te sie percors per ruèr a soluzions inovatives. Per chesta rejon l é de gran emportanza che l Recognosciment Joegn Enrescidores posse sporjer n pest en moneida adatà.
Duta la informazions en cont al avis les é sul sit: https://www.europaregion.info/it/euregio/progetti/scienza/premio-giovani-ricercatori-euregio/
Chest l é l link per desćiarièr l formulèr online per poder tor pèrt a la selezion: https://forms.office.com/e/USyk9nGLEi)
Ai finalisć ge vegnarà refat ite la speises de viac e per stèr doi net a Alpbach.
Se pel domanèr duta la informazions al Ofize de l’Euregio Tirol-Sudtirol-Trentin, referiment Jasmin Penz (tel. +43 512 5082355; jasmin.penz@euregio.info).
Traduzion di Servijes Linguistics e Culturèi del Comun general de Fascia
