L president de la Provinzia autonoma de Busan e assessor provinzièl a la Enrescida e a l ‘Inovazion, Arno Kompatscher, l é content del argoment che l é stat cernù fora: “L’energia l’é una de la costions zentrèles de nosc temp, dal sparagn energetich a la segureza del reforniment enscin a la produzion de fontènes renovaboles. Te la valutazion de la soluzions, la enrescida l’é semper n element essenzièl. Con chest pest se vel engaissèr, portèr inant e meter en coleament i joegn enrescidores che tol dant chest argoment”. La scomenzadiva no la vel demò engaissèr i joegn enrescidores, ma doventa ence n vantac per la sozietà e l’economia de dut l Euregio.
“N reforniment energetich segur e sostegnibol l é una de la endesfides più emportantes per l davegnir de dut l Euregio. Per chesta rejon spete i contribuc inovatives di joegn scienziac del Tirol, Sudtirol e del Trentin sul argoment de l’energia”, l à sotrissà l capitan del Tirol Anton Mattle. Dessema col assessor tiroleis a la scienza Cornelia Hagele, Mattle ge domana ai joegn enrescidores de tor pèrt a na vida ativa a la formazion del Euregio. “L pest Euregio per i joegn enrescidores no l porta inant demò n coleament en rei anter la trei pèrts del Euregio a livel scientifich, ma l sporc ence n contribut tecnich emportant per n svilup maor de nesc raions” disc l assessor provinzièl Hagele.
Al projet mior ge vegnarà recognosciù 5.000 euro, al secondo 2.500 euro e al terzo 1.000 euro. I projec i vegnarà selezioné da na juria reta da Ulrike Tappeiner, President de la Università de Busan. La zerimonia de premiazion la vegnarà endrezèda endèna la Dì del Tirol del Forum europeèn de Alpach, ai 20 de aost del 2023. Chi che rua te la finala i vegnarà chiamé a Alpach per portèr dant sie lurier e baratèr idees coi scienziac de nonzech e leader politics.
Duta la informazions sul Pest del Euregio per joegn enrescidores se pel les lejer sul sit web del Euregio a la direzion www.euregio.info/youngresearcher
Traduzion di Servijes Linguistics e Culturèi del Comun general de Fascia
