Traduzione in cimbro
Offe dar auzschraibung 2024 zo geba vèrt in kulturàl prodjèkte vo mearare kamöündar panåndar
Vor di lånt emtar, soinda khent untargelekk 500 tausankh euro asó azpe da auzmacht dar protokòll vor da lånt finåntzièll
[Cimbro] Schützan zuargebante ’z gèlt boda iz mångl zo macha kulturàl prodjèkte vo mearare kamöündar bodase leng panåndar un boda håm azpe zil in sèll zo macha a nètz zo macha khennen un zo geba vèrt in schatz boda aniagladar teritòrdjo hatt zo opfra un asó machan krescharn nèt lai bazta ågeat dar kultùr ma dar ekonomì un dar sotziàl pintom o; ditza iz ’z zil von provedimént, vorgelekk von vitzevorsitzar un asesór vor di kultùr, boda da provintziàl Djunta, bodase iz gevuntet an vraita atz 17 von madjo, bill az sai ånemmante in öffentlesche auzschraibung vorz djar 2024 boda ågeat in trentinar lånt emtar un boda nidarlekk di kritèrdje un bia zuarzogeba di schützt. Dar schütz steat å in provintziàl gesetz übar di kulturàln arbatn un asó azpe da auzmacht dar protokòll pittar lokàl finantzièll vor haür khemmenda untargelekk 500 tausankh euro.
Azpe da hatt khött dar asesór, dar provedimént bill gem vèrt in kulturàl, materièll un unmaterièll schatz, azpe strategesche eleméntn zo macha krescharn di lentar arbatante un machantese khennen auz von soin geografesche konfìn o. Bichte vor ditza iz innvången mearare sektör von lentar boda di prodjèkte khemmen vürgetrakk – turistìk, ekonòmege, welfare, umbèlteg, formatìf-didaktìk – un vürtrang kulturàln initziatìvan nå in sèll boda khint gevorst vo mearare kategorian nützar, zo macha ja azta da kulturàl opfar gea guat vor laüt boda nèt hèrta stian nå disan sachandarn.
’Z bartnda mang khemmen vürgelekk kulturàln prodjèkte von Toalkamöündar odar vo mearare Kamöündar gelekk pittnåndar, odar azza soin vürgelekk vonan uantzegen Kamòu di initziatìvan mochan khemmen gemacht in mearare kamöündar un innvången åndre emtar o saiz öffentlesche, saiz privètt, odar no ma haltet aztada nemmen toal laüt vo åndre kamöündar o, odar da håm ’z zil zo macha a nètz vo mearare emtar, odar da gian å in Trentinar Biblotèkar Sistèm.
Dar vorsch zo haba in schütz, geat inngètt in Dianst vor di Kultùr un mocht khemmen geschikht ducht zertifikarata post afte pec: serv.attcult@pec.provincia.tn.it odar durch Ptre vor azta auz soin di draitzekh tang azta iz khent auzgètt dar auzschraibung afte istitutzionàl websait un daz mindarste an tage pellar vorda åhevan di initzitìvan vorgelekk.
Dar formulàt innzogeba in vorsch mage khemmen abegenump vodar wwebsait PAT aftn link: https://www.provincia.tn.it/Documenti-e-dati/Modulistica. Azta dar prodjèkt iz vo mearare kamöündar dar vorsch tarft khemmen inngètt vonan Kamòu darkhennt azpe Kamòu vorånavür. Berda bart vången in schützt bart mochan volng, senonda bartnsa khemmen auzgestricht, in regolamént von brand Eco-eventi Trentino.
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
