Mercoledì, 15 Settembre 2021 - 12:35 Comunicato 2525

Traduzione in mòcheno
Naia u’stelltn en de Gamoa’n pet minder abia 5.000 voner

U’ganommen der dokument as verreglt de moglechkait ver de schòftn as hom tschèrlt de zòmmòrbet ver a toal dinstn

S kemmen gem naia moglechkaitn ver za nemmen au naia u’stelltn en de trentinisce gamoa’n bou as hòt minder abia 5.000 voner. De amministrazionen as trong envire a toal zòmmòrbetn barn hom de moglechkait za stelln u’ naia lait, derno as men bart meing aunemmen de earstn hundert lait schoa’ u’ganommen en leiste merz va de Provinzal Junta oa’ne pet de Lokaln Autonomi; ver za gem omport en de neat van gamoa’n bou as hòt birkle bea’ne u’stelltn. De mosnemm as s ist kemmen garo u’ganommen va de Junta vourtschbunnen van asesor van lokaln dinstn, ist schoa’ kemmen vourtrong en Rot van lokaln autonomi ont s ist s derkennen der bichte schicht as de gamoa’n van Trentin hom.
I Comuni della Valle dei Mòcheni [ Archivio Istituto Mòcheno / Bersntoler Kulturinstitut]

De naiekaitn, abia schoa’ tsòk, enteressiarn de Gamoa’n as barn envire gea’ pet de zòmmòrbet van a toal dinstn oder as zòmmòrbetn pet almen an òndra gamoa’ ver almen drai òrbetn zbischn de sèlln tschrim as de mosnemm (Òllgamoa’ Kanzlai, personal ont organizazion; technikomt, urbanistik ont lòntschòft, voneru’mellnseomt, hòndl, informatik dinstn) oder zboa zòmmòrbetn benns en de doin drinn sai’ de birtschòft ont gèltdinst. Òll Gamoa’ as hòt de zòmmòrbet van dinstn, bart meing aunemmen a nais mentsch. De mosnemm paschraip de virm ver de Gamoa’n as nèt s gèlt hom, za vrong der paitrog en de Provinz ver za zoln, almen en de earste zait, de kostn ver za zoln de u’stelltn.

En de mosnemm garo u’ganommen sai’ patschrim naia moglechkaitn za nemmen au u’stellnt en de lokal polizai, abia zan paispil de u’stelltn ver a kurza zait derbail as bolten turistn hòt, ver de Gamoa’n as vourstea’ en de zòmmòrbetn ver de dinstn va de polizai.

Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(Traduzione a cura dello Sportello linguistico della Comunità Alta Valsugana e Bersntol)

(cdt)


Immagini