Tel meis de november 2024 i zirca 25 joegn fascegn scric ite al projet Troupes e ades promotores de L Cucarel, i é stac a Cagliari per na full immersion de confront e de lurier coi ideatores del Babel Film Festival, la rassegna cinematografica sarda che da egn porta dant e valorisea films te duc i lengac de mendranza del mond. Te la Sardegna i joegn ladins i à prejentà so curt filmat dal titol “Al dì de doman” e i à tout pèrt a la prejentazon del Pest Kentzeboghes, concors che sostegn la produzion de films te una de la variantes del lengaz sard.
En linia con chel che da egn vegn fat te la Sardegna, L Cucarel l se met dant de ge dèr oportunità de crescimonia a joegn regisć e pascioné de cinematografia che vel realisèr si lurieres duran n strument linguistich originèl desche l lengaz ladin. La volontà de valorisèr e sostegnir la cultura de mendranza da man de la realtèdes che endreza, la Coprativa sozièla INOUT de Fascia col Istitut Ladin e la Sociazion BABEL de Cagliari, raprejenta na ocajion de enconter, de condivijion de idees e de relazion.
Duc chi che vel tor pèrt al concors, i cognarà manèr sia proponeta de projet cinematografich inant che sie fora l 1 de otober 2025. I venjidores del Pest L Cucarel, che vegnarà dic fora de november 2025, i arà a la leta n budget da 5000€ per l prum classificà e de 4000€ per l secondo, da durèr per la realisazion de n curt filmat de fiction, de animazion o documentarie, no più lonch che 30 menuc.
I films che fora per l 2026 vegnarà prodoc aldò di projec venjidores del Pest L Cucarel 2025, i vegnarà prejenté per la pruma outa tel meis de november 2026 endèna l event de prejentazion de la seconda edizion del Pest L Cucarel 2026.
