Traduzione in ladino
“Mulini aperti”: tel Trentin l’é 34 frabiches, anter molins, sies e fojines, che averc sie ujes a la jent
Domenia ai 5 de setember la dì portèda dant da la Sociazion Talièna “Amici dei Mulini Storici”
Ai 5 de setember l’é la giornèda “Mulini aperti”, scomenzadiva portèda dant da la Sociazion Talièna “Amici dei Mulini Storici” (AIAMS) che la laora con chela de studièr, valorisèr e portèr inant la frabiches idrauliches te la Tèlia.
Te la provinzia de Trent la frabiches da poder vijitèr les é 34: molins, sies e fojines de proprietà publica e di privac.
Obietif de chesta giornèda l’é chel de fèr cognoscer al publich n patrimonie architetonich, tecnologich e culturèl, scialdi desmentià, sensibilisèr l stravardament di fabricac, portèr dant sorts de turism educatif/che educhea, e per engaissèr la cognoscenza di lesc ambientèi che no i é entesseé e pontèr via endodanef col lurier di molins che sie bon de lurèr fora a na vida tradizionèla l gran che vegn cà da na agricoltura biologica te farines e prodoc per magnèr san.
Responsabola per l Trentin l’é Antonella Mott, del “Museo degli Usi e Costumi della Gente Trentina”.
L’event dèsc l met de poder ite ti lesc de lurier de gran marevea, loghé enlongia jù i ruves, olache la forza de l’èga la é bona de mever la rodes e i engranajes che tel passà i vegnia duré per majenèr la farines, per enjignèr la brées e per èrc de lurier de fer. La giornèda “Mulini aperti”, la tol l post de le “Giornate Europee dei Mulini”, che vegnissa endrezà la terza setemena de mé, event che ti ultimes doi egn no se à meter a jir a cajon de la pandemia da Covid-19.
MOLINS AVERC TE FIEM E FASCIA:
• L MOLIN DE PEZOL / IL MULINO - Sezion sul teritorie del Museo Ladin de Fascia, Pera
Orarie: 15.00 - 18.00
Informazions: 0462.760182
• MULINO DELLA MENEGHINA, Capriana (Fiem)
Orarie: 14.00 - 18.00
Informazions: 347.4466763
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
(cdt)
Immagini
