Tel orden del dì de la scontrèda dotrei ponc emportanc sun chi che la Conferenza l’à dat ju sie parer, desche la spartijon del Fon provinzièl per l stravardament de la popolazions de mendranza per l 2024, che l é de presciapech 900 mile euro e sie Pian di intervenc per l’informazion per lengaz de mendranza; i contribuc per projec de gran emportanza per l stravardament de la mendranzes linguistiches e l pian organich di intervenc de politica linguistica e culturèla del Comun General de Fascia. Più avisa, la proponetes, de cheles che se à descoret, les era en cont del pian de informazion pervedù dal art. 23 de la lege provinzièla 6/2008, co la scomenzadives stabilides a una tel chèder del Desch per la comunicazion de la mendranzes linguistiches, la domanes de finanziament per ot projec dassen segnificatives per l stravardament de la mendranzes de chi che doi i é stac mané ite dal Bersntoler Kulturinstitut, un dal Istitut Comprensif Perjen 1, un dal Kulturinstitut Lusérn, doi dal Istitut Comprensif Folgrait-Lavròu-Lusern, un da la Scola ladina de Fascia e un da la Comunità Alta Valsugana e Bersntol. A chest vegn jontà ence l trasferiment al Comun General de Fascia de na quota de arvanz sul Pian organich di intervenc de politica linguistica e culturèla.
I sentadins che fèsc pèrt de na mendranza i à derit a aer informazions scrites e audiovisives per l lengaz de vigni comunanza, aldò de la lege recordèda sunsora, che la perveit l obligh per l Comun General de Fascia, i Comuns de mendranza linguistica e sia comunitèdes, de ge dèr didament a l’editoria e a l’informazion per lengaz de mendranza, de sostegnir l’inovazion tecnologica e sie sparpagnament ence fora da sie teritorie. I intervenc i vèrda, per ejempie, la publicazion de piates periodiches per lengaz sui sfoes locai, la trasmiscions di notizières de la setemèna per zimber e mochen, i programes televisivesper ladin, la stampa e l sparpagnament di sfoes per lengaz.
Dotrei intervenc i é stac metui a jir da la Jonta provinzièla medema, descheche chi dintornvia l sistem radiotelevisif per l’informazion per todesch e ladin, mochen e zimber. Più avisa, descheche à recordà l president Fugatti, l é jà stat troà fora coluna scomenzadiva jontèr ite tel Program di intervenc per l’informazion per lengaz de mendranza 2024-2025, moscèr i canai ORF 1 e ORF SPORT de la emitenta televisiva austriaca ORF ti raions olache l é enciasà la Mendrazes linguistiches storiches e te duta la Provinzia autonoma de Trent. I canai i vegnarà moscé de gra a n contrat col operador de rei EI Towers, enscin ai 15 de otober del 2025. Amò apede, l é jà en esser la sperimentazion del servije de trasmiscion HBBTV di contegnui che vèrda la mendranzes linguistiches storiches del Trentin su smart tv.
Fotografies fates dal Ofize Stampa
Traduzion di Servijes Linguistics e Culturèi del Comun general de Fascia
