S ist arauskemmen der nr. 34, s heftl pet stickler as bersntolerisch, balsch ont taitsch

“Lem”, austoalt de zaitschrift van Bersntoler Kulturinstitut zòmm pet en klender 2025

[Mòcheno] Der nai numer van Lem, de zaitschrift van Bersntoler Kulturinstitut as tschickt kimmp umansist en de familie van Tol, en de sèlln as iaz lem umanònder en Trentin ont en de bèlt ont en de innrichtungen ont vraischòftn as zòmmpuntn sai’, hòt stickler as bersntolerisch, balsch ont taitsch.
Der numer va schantònderer klòfft mear as ònderst van bichtegestn òrbetn as gatu’ kemmen sai’ en jor: der internazionalet convegno as en bersntolerisch ont as òndra taitscha sprochen “De bèlt um ins” va de 10-12 van schanmikeal 2024, de vaiern ver de 700 jarder va de grundung van Filzerhof as iaz ist an museo, de òrbetn va catalogazion ont de sèll ver za gea’ envir pet de bersntoler beirterpònk.
Men kònn aa vinnen eppas as de òrbetn as s Institut òll jor envir viart, abia de konkursn as bersntolerisch 3 ver 1 ont der Summer club, de unterhòltboch ver de kinder en summer.
De zaitschrift hòt dòra viar rubrikn: “Tovl”, bo as kemmen gadenkt de òrbetn as offet sai’ oder as garo garift sai’; “Spiln” pet laichta kinderspiln; “òlta kuntschòftn” pet sòchen as pasiart sai’ oder as za denken sai’ van derver va de gamoa’schòft; zan leistn “S bersntoler Rachl”, a sait pet zoachen ont beirter as hòt an ettlena protagonistn as hom za tea’ pet en bècksl van zaitn.
En earste artikl kònn men vinnen de nain orgln van Institut ont a stickl va de presidenten Patrizia Bocher.