
De paitrong asn doi tema sai’ kemmen trong va regionaln paispil as kearn de ladiner, de zimber ont de bersntoler, ober aa va saitn abia de katalanesche ont de basken va de Spagna, va de balsch minderhait en Slovenia ont van sprochminderhaitn as sai’ en de region van Brandeburgo en Taitschlònt. En de mitt van trèff, de bichtekait van schutzn de sprochminderhaitn, iberhaup abia as gilte ist learnen de sproch schoa’ vour za gea’ za schual ont en òlla de virm va u’lear: an sozial, an kultural ont an identitet pahalter za derhòltn ont paun.
En trèff hòt toalganommen, zbischn vil òndra, de Patrizia Cordin, learer en de Universitet va Trea’t, as hòt derklort de sòch van mearersprochen ont de ist koordinator van an projekt garift en 2006, iber en earste beirterarkif van trentinische dialektn. Iberhaup sai’ kemmen u’gariart de temen van kompetenzn ont van “metakompetenzn”, as stòmmen van kennen prauchen mearer sprochen schoa’ va benn as men augòngen ist. S ist ausser kemmen de bichtekait as de familia ont de u’lear hòt, as kimmpt versterchert durch a gamoa’schòft va u’learer ont va de schual. Kennen van a sproch as de ònder gea’ en doi vurm kimmp an bòcksn van an sozial ont van an kultural pahalter. En de glaiche zait, ist kemmen unterstraicht òlls sèll as va aus kimmp abia ver en sèll as keart abia as stea’ de familie ont bos ver a u’lear as de hom. Asou ist runt bichte za stitzn de doin momentn va u’lear drinn en de u’lear istituzionen ont en de familie.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol