Traduzione in cimbro

Lavròu, Folgrait, Lusérn: schiar 18 mildjü euro arbatn

Da soin schiar 18 di mildjü euro vor naüge arbatn boda soin khent vürgelekk vor di lentar vo Lavròu, Folgrait un Lusérn: an vraita atz 13 von madjo zo reda übar di bichtegarsten prodjèkte iz gest dar vorsitzar Maurizio Fugatti, in prèss punkt bodase iz gehaltet verte azta iz gest da provintziàl Djunta boda iz khent gemacht atz Lavròu pinn Pürgemaistar Isacco Corradi un pinn åndarn vüarar.
“Bar soin drumauz z’arbata zo pezzra di pintom vo Lavròu pittar haupstatt, un vor ditza azpe Djunta habar inngeschribet in Plån von arbatn 10,2 mildjü euro vor in bege von Laaz boda bart pasàrn dar Giro d’Italia – dise soinz di börtar von vorsitzar Fugatti – aft disan bege straordinardjo soinda sa drå zo khemma gemacht di earstn arbatn vor schiar 1,2 mildjü euro. An åndadar prodjèkt geat å in bege boda vo Kaliå khint auvar zuar Folgrait, in lånt vo Dietro Beseno, da habar inngeschribet in bilåntz 4 mildjü euro, un vor lest soinda khennt inngelekk in bilåntz 3,6 mildjü euro vor in bege vodar Fricca. In gåntzan soinz schiar 18 mildjü euro – hatta gemacht verte zo khöda dar vorsitzar – boda zoang no a bòtta ke disa aministratziong hatt ka hèrtz di lentar vort bait von stattn: pròpio di pintom zbisnen ’z tal un di lentar von pèrng iz dar zentràl tèma boda iz auzkhent von “Stati generali della montagna”.