De trèffen kostn nicht ont sai’ offet en òlla finz as de platz garift sai’. Ver za nemmen toal men miast se innschraim. Der earste trèff ist en programm ver en mitta af de 20 van leistagest, va um 17:00 finz um 18:00 ont bart klòffen iber en tema va de informatiksicherkait. De online trèffen sai’ a stuck van projekt as u’pfònk ist durch en summer pet en autea’ van 5 tirler avn lònt va Cavalese, Malè, Rovereto, Tione ont Trea’t, bou as de lait gea’ meing ver za kriang hilf, paglaitung ont lear a’ne kostn ver en prauch van dinstn ont van digitaltechnologian.
Òndra vinf tirler barn augat’ kemmen en de bochen as kemmen ka Riva del Garda, Persn, Burg, Primiero ont San Giovanni di Fassa. En 2024 de barn 22 sai’ de tirler offet ver de lait gèltsgott en de zòmmòrbet va de Provinz ont van Consorzio van Trentinergamoa’n. S dinst ist a’ne kostn ont offet ver de lait van an iata elt ont van an iatn kennentritt. S ist ganua mèldn se durch en portal va de Provinz www.provincia.tn.it/Digitale-Facile.
Ver za schraim se inn en de online trèffen men mu aninngea’ en de sait va Trentino School of Management:
https://www.tsm.tn.it/attivita/punto-digitale-facile-seminari-online .
S hòt an grea’nummer aa, 800228040, as men u’riaven kònn ver za vrong hilf ont òlla de nochrichtn as noat sai’ ver za mèldn se en de hilftrèffen oder ver za schraim se inn en de online trèffen.
Do vinnt men bos as tsòk hòt Cristiana Pretto, iberòllviarer Umst verlaichtern ont digitalisasion va de Autonome Provinz va Trea’t ont Nicola Villa, vourstea’ner va de Digitalbècksl ont vernaiern Unitet Tsm:
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
