Traduzione in ladino
L é fora l avis 2024 per valorisèr i projec culturèi soracomunèi
L se ouc ai enc locai, l dèsc fora 500 mile euro aldò del Protocol de cordanza en cont de finanza locala
[Ladino] Finanzièr projec culturèi soracomunèi che i à l obietif de meter an esser sistemes locai, de fèr na rei per meter en contat l patrimonie acioche l vegne valorisà e de integrèr sogec e ativitèdes tel chèder teritorièl aldò del peis che l à per la cultura, ma ence per l sozièl e per l’economia di projec medemi: l é l fin del provediment de la Jonta provinziala che se à binà en vender ai 17 de mé, metù dant da la vizepresidenta e assessora a la cultura, che l à aproà l avis publich per l an 2024 che se ouc ai enc locai trentins e che l stabelesc i criteries e la modalitèdes per la conzescion di contribuc. L didament l fèsc pèrt de la lege provinzièla per la ativitèdes culturèles e, desche pervedù dal Protocol de cordanza en cont de finanza locala, l met a la leta 500 mile euro en dut per chest an.
Coche l à dit fora l’assesora, l provediment l vel valorisèr l patrimonie culturèl, material e no material, desche element strategich del svelup local tras na gestion e promozion percacenta, per chel che revèrda l’identità e ence la visibilità sorafora sie confins geografics. Elemenc prinzipai l é tor ite i autres setores del raion – turistich, economich, welfare, ambientèl, de la formazion e didatich – e desferenzièr la scomenzadives culturèles aldò di besegnes de la desvaliva categories de utenc, per fèr acioche la perferida culturèla la engaisse ence chiche no é trop per tor pèrt a scomenzadives culturèles.
Podarà portèr dant projec culturèi la Comunitèdes de val o i Comuns, se i projec i è endrezé da più Comuns, o, se endrezé demò da un Comun, se cogn meter a jir scomenzadives che tole ite più che un Comun o esser endrezé dessema con sogec publics o privac de etres raions, o i cogn perveder che la jent che tol pèrt la vegne da Comuns deferenc, o aer desche obietif de meter a jir rei locales o tor ite argomenc che se lea col Sistem de la Biblioches del Trentin.
La domana de contribut, da ge manér al Servije Atività e produzion culturèla, la cognarà esser manèda ite tras posta eletronica zertifichèda a la direzion PEC: serv.attcult@pec.provincia.tn.it, o per interoperabilità PiTre, dant che sie fora i 30 dis da la publicazion del avis sul sit internet istituzionèl e amancol l dì dant che vegne metù a jir la scomenzadives a cheles che la domana fèsc referiment. Se podarà desćiarièr l formulèr per la domana dal sit de la PAT a chest link: https://www.provincia.tn.it/Documenti-e-dati/Modulistica.
Se l é più che un Comun titolèr del projet, la domana la cognarà vegnir manèda ite dal Comun cernù fora desche capogrop. I sogec che ciapa n didament i cognarà se dèr ju a respetèr l regolament del logo Eco-eventi Trentino, senó no ge vegnarà dat l finanziament.
Traduzion di Servijes Linguistics e Culturèi del Comun general de Fascia
(cdt)
Immagini
