Venerdì, 03 Marzo 2023 - 15:42 Comunicato 587

Traduzione in ladino
L bolatin de la levines del Euregio, n servije semper più apede ai sentadins

L é stat portà dant a Casa Maggioli l projet che à tout ite Trentin, Sudtirol e Tirol

Ai 28 de firé a Casa Maggioli a Trent, tel terz apuntament del 2023 di Mèrtesc del Euregio, l é stat portà dant l bolatin de la levines fat da duc trei teritories.
À portà dant l projet e valutà l servije valanghe.report, agiornà a do a do e te più lengac, Mauro Gaddo, diretor del ofize previjions e pianificazion (meteotrentino) (NOME?)del Servije de prevenzion di risesc e de la zentrèla unica de emergenza de la Provinzia autonoma de Trent, e Christoph Mitterer del Dipartiment per la gestion de la emergenzes del Land Tirol.
À rejonà dantfora Elisa Bertò, vizesecretèr generèl del Euregio, che l à sotrissà coche chest projet l rue apede ai raions e soraldut a chi che vif ti nesc teritories da mont. “L Euregio l é ence chest: na vida de ge sporjer servijes ai sentadins”, l à dit Bertò, che à spiegà che “La vejinanza ai sentadins l é un di obietives de la neva reforma di ac sun chi che l é stat metù su l Euregio, che vegn fora soraldut da la forza e da la convinzion che se met per fèr projec desche chest”.

Un momento della presentazione a Casa Moggioli del bollettino valanghe dell'Euregio (Mauro Gaddo, Elisa Bertò) [ Foto Euregio]

L bolatin l é stat metù a jir acà cinch egn e, descheche l à spiegà Gaddo, tel scomenz l era soraldut un servije de Protezion zivila, enveze col jir di egn se à vedù che l é stat semper più enteres da man de chi che va sa mont.
Aldidanché l bolatin de la levines del Euregio l se ouc a duc chi che va sa mont, tant ai escurscionisć, che ai responsaboi de la protezion zivila e che ai enc del teritorie. Gaddo à spiegà amò apede “Chi che va coi schi da mont, co la cèspes e duc chi che fèsc sport sa mont se joa de chest servije, percheche i pel aer sot eie, te n soul moment, la situazion en cont al risech de levines de duc i raions del Euregio, coscita da poder jir a fèr sia raides ti lesc con manco risech”. I vantajes che vegn ca da chest servijes i é tropes, à dit amò Gaddo: “Per ejempie na soula piataforma olache duc pel durèr i medemi strumenc. Con chest voi sotrissèr soraldut l strument de traduzion simultana: co la doura de la medema frases ti trei lengac, talian, todesch e ingleis, la informazions les vegn entenudes da duc zenza strantenimenc. Estra apede l é n projet che dèsc l met a nos tecnics de se baratèr e aer maor informazions, se luron ensema emparon e crescion ensema”.

Mitterer l à portà dant te n filmat l’atività di profescionisć che met ensema l grop de lurier e l à sotrissà che l projet l é inovatif, ence a livel european, e per chesta rejon l é stat domanà informazions ence da man de la region di Pirenei, che l à besegnes de la medema sort del Euregio tant dal pont de veduda del teritorie che del lengaz. Estra apede l é stat portà dant i contegnui a la leta sul sit valanghe.report, pien de informazions e co na grafica sorida da entener.

Tinultima Chiara Ida Pompeo del Euregio, cha l à ret la scontrèda, l à recordà che a Dispruch, tel Infopoint Euregio Tirol-Sudtirol-Trentin, l é na mostra interativa permanenta su la levines, che documenta la storia de la più grana levines vegnude ju te chisc trei teritories da la Gran Vera inant, e che se pel la veder dal lunesc a la jebia da les 9 dadoman al mesdì, e da la 2 enscin les 5 domesdì – de vender da les 9 dadoman al mesdì.

Se troa autra informazions en cont al bolatin de la levines del Euregio sul sit  https://valanghe.report .

Fotoservije per endrez del Ofize Stampa Pat e Euregio

Video Euregio Lawinenreport/Filmat Bolatin de la levines del Euregio

Traduzion di Servijes Linguistics e Culturèi del Comun general de Fascia

(cdt)


Immagini