Traduzione in mòcheno
Ka Cavalese hòt se zòmmtroffen der Gamoa’nrot van Euregio
En vraita as de 21 van heibeger bail der zòmmtrèff van Gamoa’nrot van Euregio ka Cavalese, bail der To van Gamoa’n 2023, bou as sai’ kemmen gamòcht mearer trèffen ont naiekaitn ver za unterstitzn de zòmmòrbet zbischn de lander, ist kemmen u’ganommen a mosnemm keing der bostriko.
De mosnemm lont inn de junte va de autonome Provinz va Trea’t, va de autonome provinz va Poazn ont van Land Tirol za nemmen u’ vourtschbinnen ver naiaòrbetn auslònt as guat gea’ ver za hòltn au s vermearern se van bostriko ont van verderm van holz en de balder.
“Der GECT ist an bichtegen orgl ver za trong envire projektn ont vourtschbinnen as guat gea’ ver de lait.
Gem a hilf en de amministrazionen van drai lander ver za klòffen se pesser aus ont asou meing vinnen oa’nekaitn ist en de natur va de inser istituzion”, hòt se tsòk de Elisa Bertò, de iberòllsakretare van Euregio.
Der Gamoa’nrot ist an vrogorgl va de Junta van Gect Euregio, bou as toalnemmen vifzen lait, vinf ver an iats lònt, paut ver za verglaimern de lait en de euroregional istituzionen. Der kimmp galisnt benn as vrogn oder vourtschbinnen hòt as meing drinn kemmen galeik en òrbetprogramm van Euregio, no en de neat va de lòntschòft, asou as de euroregional òrbetn mear bèrt hom.
Bail en zòmmtrèff ka Cavalese ist kemmen simbolesch ibergem de Glock van Gamoa’nrot van Euregio zbischn der president van Trentinische Gamoa’ngasellschòft Paride Gianmoena ont der president van Südtirol Gamoa’ngasellschòft Andreas Schatzer. Der doi simbolesche zoach mèlt u’ s bècksln van president van Euregio as bart sai’ en leistagest zbischn der president Maurizio Fugatti ont der president Arno Kompatscher.
Letratdinst gamòcht van Druckomt
Traduzion di Servijes Linguistics e Culturèi del Comun general de Fascia
(cdt)
Immagini
