I obietives de la neva cordanza, che ge va dò ai protocoi internazionèi en cont de sostenibilità e de stravardament de l’ambient, i é sacotenc. Dandaldut, bensegur, l smendrament di gasc che i muda l tempram, aldò di obietives del Green Deal europeèn, engaissan la doura de mesi che no entesseea, la creazions de fermèdes de barat anter mesi de trasport privac e publics, e en generèl smendran l numer di auti sui jouves e ti paìjes. L nef sbunf resservà a la creazions de neves sistemes de mobilità integrèda zenza emiscions cognarà ence miorèr la calità de la vita e de l’ambient a favor de la jent che vif te la valèdes enteressèdes, ma ence portèr ejic postives per i sacontenc vijitadores, che i podarà se goder dassen la carateristiches e la mareves del raion.
Per arjonjer chest resultat fèsc besegn de na gran volontà de integrazion strategica e operativa de duc chi che tol pèrt. La cordanaza che l’é stat arjont anter i sotscritores del Protocol l’à apontin chest obietif. Chesta cordanza la perveit anter l’auter de meter sù n endrez anter la provinzies, per meter a jir l Pian de più egn per la mobilità sui jouves de la Dolomites e controlèr i svilupes, binèr sù dac en cont del trafich di auti, a na moda da valutèr con atenzion no demò l’intensità e la frequenza del trafich, ma ence sia carateristiches tras la 12 stazions de control en esser, e enjignèr la documentazion de ùtol per domanèr i finanziamenc nazionèi e europeegn.
La Provinzies autonomes, la Region del Venet, la Provinzia de Belun, i Comuns de Selva de Gherdena, Corvara, Cianacei e Fodom i se tol sù l’encèria ence de:
- Troèr fora te na pruma fasa soluzions per l 2021-2022 per engaissèr la mobilità ativa (per ejempie: smaorament de la perferida de trasport publich dal post, enjignèr biliec integré e endrezèr campagnes de comunicazion);
- Troèr fora i intervenc de projetazion enjegneristica su la strèdes en esser tel trat de temp 2023-2024 (strèdes per la rodes enlongia i jouves de la Dolomites, piac dai auti resservé te ogne una de la cater valèdes);
- Analisèr la possibilitèdes tecniches e giuridiches per otimisèr e endrezèr l trafich;
- Troèr fora n sistem de informazion per duc en cont di movimenc del trafich de la cater valèdes;
- Endrezèr n sistem digitèl de gestion e control del trafich dintorn i cater Jouves;
- Engaissèr la prejentazion de domanes dessema a livel politich-aministratif nazionèl co l’obietif de arjonjer cofinanziamenc europeegn per meter a jir l projet.
I sotscritores i dezidarà delaìte di 60 dis che vegn, n Pian de atività per doi egn, olache vegn metù dant avisa la ativitèdes per i prumes 6 meisc, e i cognarà troèr fora la strutures da tor ite te la desvaliva ativitèdes, estra che i referenc tecnics e aministratives per meter en doura l Protocol, con regnèda de doi egn che sencajo se pel renovèr.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
