L liber - dat fora da Cierre Edizioni adum col Istitut Cultural Ladin “Cesa de Jan” del 2023, giusta 100 egn do la spartijon aministrativa di Ladins te 3 Provinzies e 2 Regions desferentes - l é la verscion smaorèda e agiornèda de na edizion più veia, che la tol ite i egn dal 1948 a anchecondì respet a chela del 1986. Se trata de na opera zis de valuta che la à dat l met de studièr la storia del popul ladin de gra al rigor scientifich recognosciù de l’autora.
La opera, portèda dant da l’Union di Ladins de Fascia e dal Istitut Cultural Ladin Majon di Fascegn, la conta de la posizions toutes, de la ilujions e de la speranzes de la comunanza de Fodom, col meter dant ence la strumentalisazions politiches padides dessema con la autra valèdes ladines de la Dolomites fora per la pruma metà del Nefcent: co la Gran Vera e l passaje da l’Austria a la Tèlia, la opzions, la Seconda Vera e i egn do la vera, ruan al svilup economich e ai tempes de anchecondì.
Luciana Palla ge va do con n eie ascort al nascer e al mudèr de na coscienza identitèra che aldidanché i Ladins cognessa fèr amò sie per ge vardèr con gaissa al davegnir.
