Der trèff van pfinsta af de 28 van genner hòt gem de moglechket en de drai presidentn za schaung aus de bichtestn temen, za klòffen va de krònket Covid-19 ont van pèlzn se. S ist unterstrichen kemmen abia as men heart zbischn de lait a groasa mia ver sèll as passiart. Men hòt se vil gabòrtn va de òrbet van pèlzn, ober iaz boast men nèt rècht abia as gea' bart. Dòra s hòt unterschittn zbischn de regln van drai lender as hom za tea' pet de grenz van Brenner aa, petn riarn se ont òrbetn af de drai platz. En Trentin hòt der Fugatti tsòk as de situazion ist no za verpessern.
De nai Konvenzion ont der nai Statut
No en trèff va de Junta, hòt se zòmmtroffen der Zòmmriaf van Euregio aa, as araustschaut ont u'ganommen hòt de vourschlong van EuregioLab van vourder summer. S ist schoa' vourtrong kemmen gaben a bozza van auskennetmentsch va europeische rècht, Walter Obwexer.
No en de bozza u'ganommen, der numer van Zòmmriaf bart va 12 af 15 trong kemmen, pet de kritern as de Zòmmriaven song barn.
De barn meing technische Junte u'song meing, gamòcht va asesorn as barn schaung za unterstizn de òrbet van drai presidentn.
Der GECT, ver za trong envire de sai'na riven, bart klòffen meing va òlla de sòchen as hom za tea' pet de drai lender, no en de regln van zboa Stòttn.
De nain regln van GECT song as de gamoa'n barn zòmmòrbetn meing abia “Konsultivrot van Euregio”, as bart versterchert kemmen pet de gamoa'vraischòftn (ver en Trentin s Autonomirot/der Gamoa'konsorzio); men denkt as der bart en herbest van 2021 gamòcht kemmen. Ont nou: de Junta bart zòmmleing menig rotn van lait, as barn s rècht hom za trong envire vrogn en Zòmmriaf.
Iaz ist men no za bòrtn, en a 6 mu'netn ungefer, as de stòttregiarn oa'ne sai' pet de doin dokumentn. Dòs bart gem en Euregio de moglechket za nemmen sa u' en summer as kimmp.
Vernaiern va de istituzion, drinnleing de projektn en an guatn vurm
“Haier der Euregio vaiert de zeichen jor, turch en bècksl van Statut, ber barn zòmmleing de òrbet van Euregio van zeichen jor as kemmen – hom tsòk de drai presidentn. - Ber sai' no za tea' naiorganisiarn der Euregio, asou as der bart meing de projektn enviretrong gahasseger, pesser ont pet mear lait, asou as de òlla hearn meing as der Euregio eppes mear ist ver sei aa.
Zòmmòrbetn pet de lait ont de gamoa'n, ont versterchern de parlamentn as stimmt kemmen sai', sai' runt bichtegen temen. “No en motto van tirolerpresident 'du bist Teil davon', s sai' u'tsok kemmen de elementn ver a nou stercher zòmmòrbet zbischn de drai lender van Euregio”, hòt nou tsòk der kapitan van Tirol Platter. De nain statutn barn untertschrim kemmen en To van Tirol bail en Forum va Alpach. En de earstn sechs mu'netn barn araustschauk kemmen de bècksln en de Kostituzion van Euregio gamòcht va Balschlònt ont Osterraich.
S nai Omt ver de Nochricht ont s Kordiniarn en Innsbruck aa
Va moi envire, an nain Omt ver de Nochricht ont s Kordiniarn en Innsbruck bart verglaimern der Euregio en de lait. “Pet an sol ver de austelln en unterstock van haus Menardi in Wilhelm-Greil-Strasse, ber lonen inn òlla de lait za vinnen araus eppes mear va sèll as der Euregio gem meichet” hòt tsòk der Platter. De austell bart òlbe vergreasert kemmen ver za klòffen iber de argumentn mear interessant van Euregio. De austell “Geschichte der Europaregion" bart u'vònegn en langes. En summer bart u'vòngen a austell iber s Jor van museum, en herbest oa'na iber en tema “De schnea'lan van Euregio”.
S Omt ver de Nochricht ont s Kordiniarn va Trea't bart u'vòngen za òrbetn, abia schoa' tsòk, en herbest, zòmm petn bècksl va de presidenz. “Zòmm petn schea' sitz van Euregio en Waaghaus en Poazn, pet de zboa “vourpostn” ber lòng nou mear sechen der Euregio en de lait van Tirol ont van Trentin”, de hom tsòk de drai presidentn.
Jor van Museum van Euregio
Zan leistn, der kapitan van Tirol ont de presidentn va de Autonome Provinz va Poazn ont Trea't hom gameicht zòmmklòffen van Jor van Museum van Euregio. Men billt s autea' en moi van 2021 ont 60 museum en gònzn, van òlla de drai lender, sai' no za nemmen toal en projekt.
Pilder ont vrong en Fugatti gamòcht van druckomt.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(Traduzione a cura dello Sportello linguistico della Comunità Alta Valsugana e Bersntol)
