Traduzione in cimbro
Font Euregio vor di nåsüach, ågenump in Akòrd vor 1,3 mildjü euro
Di prodjèkte geschützt mochan ågian alle di drai lentar von Euregio
[Cimbro] Ågenump vodar provintzial Djunta, vorgelekk von asesór afte bichschaft, arbat, universitèt, nåsüach, in skèm von Akòrd gemacht pittnåndar pinn GECT Euregio Tiról-Südtiról-Trentino, pittar autonome Provìntz vo Tria, da autonome Provintz vo Poatzan un ’z Lånt Tiról, skèm boda vorlekk bia zo arbata pittnåndar zbisnen in drai lentar vor bazta ågeat in 5° auzschraibung von Font von Euregio vor di nåsüach.
Vor in asesór vürvüarn, schützan un machan khennen nåsüach un vornaügarom soin a gruntegar strumént zo macha krescharn, saiz in mentschschaftlege schatz, saiz in sistèm von firmen. Ma sait nå, defatte, zo lega in spil di qualitét un di konkoréntz vodar gåntzan Provìntz. Vor daz sèll di Provìntz schupft zo macha sbern mearar in Trentino a livèll internatzionàl in sektór vodar nåsüach un vodar vornaügarom durch in sèll boda mage tüan dar Euregio o.
Dar provedimént geat å un vüart vür arbatn boda sa soin gest khent geschützt von GECT Euregio vor bazta ågeat di nåsüach; atz haüt, deffatte, soinda khent ågenump drinn in ESF viar auzschraibung, boda håm zuargètt zo macha 23 interedjonàlege prodjèkte vor schiar 8,5 mildjü euro in gåntzan.
Di prodjèkte boda bartn khemmen ågenump z’soina geschützt vor di drai djar 2025/2027 bartn mang nützan 1,3 mildjü euro, gelekk vodar ünsarn Provìntz åhevante von djar boda khint, asó azpe da hatt khött dar vorsitzar vodar autonome Provìntz vo Tria.
Dar GECT Euregio hatt zbisnen soin ziln zo macha khennen un zo sterchra bazta ågeat dar bizzschaftege nåsüach, durch initziativan boda innvången nåsüachar vo alln drai in lentar von Euregio, Tiról-Südtiról-Trentino. Vor daz sèll schiar vor zen djar di Djunta von GECT hatt deliberàrt auzolega in ESF (Euregio Science Fund) boda vürtrakk internatzionalege prodjèkte übar dar nåsüach in sektör boda ågian alln. Nå ditza khinta vürgelekk zo untarschraiba an Akòrd zo arabata pittnåndar fra in GECT sèlbart un di govèrne von drai lentar auzzogeba auzschraibung alln sovl zait. Pitt disan provedimént khinta ågenump dar skèm vo disan Akòrd zo arbata pittnåndar un gitt zuar in vorsitzar vodar Provìntz zo untarschraibanen, darzuar khinta auzgemacht hintarzohalta aftn provintziàl bilåntz ’z gèlt boda iz mångl zo zala dise prodjèkte.
Dar koordinamént un allz daz sèll boda mocht khemmen getånt vor in vünfte auzschraibung khint gètt vor disa earst zait in Lånt Tiról, lai zo schètza di prodjèkte boda bartn khemmen inngètt augehaltet o von österaichege Font vor di bizzschaft (FWF), vor dise aktivitét disar provedimént hatt zuargètt in GECT Euregio in toal boda austeat in aniaglaz lånt von 86.666,67 euro in gåntzan.
Åndre informatziongen mang khemmen gevuntet afte websait: https://www.fwf.ac.at/en/funding/portfolio/international-collaborations/tyrol-south-tyrol-trentino
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
