Traduzione in ladino
Festival de la Joentù del Euregio: enscinuazions enscin ai 14 de jugn
La undejeisema edizion l’à desche argoment “inovazion e tradizion”. L president Fugatti: ocajion per ge fèr viver l Euregio ai più joegn
Dai 21 ai 24 de setember del 2022, la undejeisema edizion del Festival de la Joentù del Euregio la vegnarà metuda a jir a Rorei tel Trentin e 36 studenc, dai 16 ai 19 egn, i podarà jir tel fon del argoment “Inovazion e tradizion”.
L Festival de la Joentù l pearà via co la vijita al nef ofize de informazion e coordenament Euregio a Trent e l perveit n confront con esperć e relatores e l met per i joegn de descorer en cont del Euregio e de sie davegnir col president del Euregio e de la Provinzia autonoma de Trent Maurizio Fugatti.
L Festival de la Joentù del Euregio l met dant ence n rich program culturèl e de delet che tol ite workshop con aziendes inovatives del Euregio e l met de descorer con esperć. Estra apede, de gra al Festival, i joegn podarà cognoscer e scontrèr conscric che vegn ca dai raions del Euregio.
Se pel se enscinuèr enscin ai 14 de jugn su https://www.europaregion.info/it/festival/. Se pel tor pèrt debant.
L program de la presidenza trentina, aldò del slogan “L Euregio l é joen” la vel ge dèr lèrga ai joegn. L president de la Provinzia autonoma de Trent e del Euregio Fugatti l sotrissea donca che “l Festival de la Joentù l é n ejempie de suzes: i joegn cognosc l Euregio e i fèsc amicizies sorafora la seides. A chesta vida i fenc i à l met de viver l Euregio, e l medemo, l é bon de ge jir do ai besegnes e a la domanes di joegn”.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
(cdt)
Immagini
