La dezijion del goern provinzièl la é stata engaissèda dal debatit e da la proponetes vegnudes fora a livel publich dintornvia l argoment de la mobilità sostenibola e l coleament anter i raions, desche chel portà dant da la sociazion Transdolomites. La colaborazion con RFT la vegn ca dal obligh tout su da la Jonta col orden del dì aproà dal Consei Provinzièl tel 2021, dintornvia l studie de la fatibilità tecnich economica de l’opera.
Tel spezifich, col schem de cordanza, la Provinzia ge dèsc su la encèria a RFT de meter ju n document de fatibilità dintornvia alternatives de projet (DocFAP) per pissèr n coleament co la ferata anter l capolech de la Provinzia e la valèdes de Cembra, Fiem e Fascia. L document doventa n strument de utol per troèr fora la pèrt tecnich economica de n percors più adatà ma ence per stabilir la politiches per l trasport e la sort de ejercizie, aldò de n studie che tol en conscidrazion la domana e ence la linies prinzipèles de projet per troèr fora i intervenc e l empegn economich per n coleament nef de la ferata.
Te la deliberazion vegn sotrissà la potenzialitèdes positives de la ferata: n sistem de trasport che podessa doventèr n element de calità per l turism che l é semper più ascort a la conservazion del ambient da mont, dolomitich, che dèsc l met de se goder l bel de la valèdes da mont, desfrutan na mobilità che no sosceda stress e che smendra la coudes sun strèda, col mantegnir l coleament coi impianc portamont via per l invern e coi lesc da mont via per l’istà.
Traduzion di Servijes Linguistics e Culturèi del Comun general de Fascia
