Traduzione in mòcheno

Euregio Summer Camp: natur, kultur ont vrai’tschòft aus de grenz

S ist garift der Euregio Summer Camp, gamòcht ver de jungen van Tirol, Südtirol ont Trentin inngalont va de 20 finz as de 27 van agest en a struktur ka San Valentino ka Brentonico, en Trentin. Ungefèr 60 jungen ont diarnen zbischn de 12 ont de 15 jor hom gahòt de moglechkait za vertraim a goldena boch voll va trèffen, zbischn de balder ont de bisn durch an programm va natur ont kultur. 
“De jungen sai’ bichte gaben ver de trentinische presidenz van Euregio ont de sai’na vourtschbinnen van camp lòng sechen dòs: s ist bail de doin trèffen as de drai lander kennen zòmmstea’ ont aupaun a zòmmòrbet drinn en Euregio”, hòt er tsòk der president va de autonome Provinz va Trea’t ont van Euregio Maurizio Fugatti. 
Der president va de autonome provinz va Poazn Arno Kompatscher sok nou: “S sai’ iberhaup de jungen as villn der Euregio va lem ont gea’ aus van grenzn. Der Euregio Summer Camp unterstitzt s zòmmstea’ van jungen van Tirol, van Südtirol ont van Trentin ont s verglaimert sa en an klòr ont u’lear vurm”. 
“Der Euregio Summer Camp ist a schea’na moglechkait ver de jungen van Tirol, van Südtirol ont van Trentin za vertraim an ausòndra boch en de lust van Euregio. Men mu’ kennen naia kamaròttn ont learnen ont klòffen a naia sproch derbail as men spilt”, unterstraicht der haupmònn van Tirol Anton Mattle.