Un di momenc più speté del Camp l’é stat chel de en mercol ai 28 canche chi che à tout pèrt à podù se scontrèr coi campions de la Fiamme Oro che à tout pèrt a evenc sportives internazionèi de valuta e che à arjont resultac ezelenc ai Jeghes Olimpics, che à vent te la Copa del Mond e ai Europees. Anter chisc Nadya Ochner, Arianna Sighel, Stefano Ghisolfi, Daniel Grassl, Nadia Delago, Camilla Moroni, Alex Insam, Anna Comarella. Ma semper en cont del contat col setor del sport de aut livel, via per la setemèna l’é stat pervedù ence la vijita al Villaggio Viola de l’AC Fiorentina, squadra de balon che jia te la serie A talièna, che vegn a se arcedèr apontin a Moena. Endèna la setemèna, l’é sta endrezà ence momenc culturèi desche la sera olache l’é stat rejonà de cyberbullismo.
“L Sport Camp l’é na scomenzadiva che arvejina l’Euregio ai joegn e che ge dèsc l met de arjonjer capazitèdes e competenzes neves e de utol. Veder i joegn di trei raions duc ensema a Moena l’é n event che ne dèsc na gran sodesfazion e che dèsc l met de entener la oportunitèdes che pel sporjer l’Euregio a na vida concreta” despiega l president de la Provinzia autonoma de Trent, Maurizio Fugatti.
“L’esperienza de l’Euregio Sport Camp – sotrissea l’assessor al sport de la Proviniza autonoma de Trent, Roberto Failoni - la conferma coche l’atività sportiva pel doventèr n element de cognoscenza per i joegn che vegn da raions desvalives e l’é na pèrt concreta per fèr doventèr l’Euregio na realtà più adum e bona de engaissèr ativitèdes de utol e de enteress per i sentadins di trei raions che i n fèsc pèrt, te chest cajo co na gran atenzion per i joegn”.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
