La mostra
Chest an l é l cincanteisem cedean del secont Statut de Autonomia e la mostra permanenta “La Provincia si racconta”, endrezèda da la Fondazion Museo Storich del Trentin, à desche obietif “contèr” la storia, l didanché e l davegnir de la istituzion de la Provinzia autonoma de Trent. L percors, spartì anter desferentes postazions e instalazions, l tol ite l prum partiment de la senta de Piaza Dante, da la entrèda prinzipèla enscin al portech Winkler.
“La Provinzia si racconta”, projet avert e che cresc man a man, met dant con sia instalazions n muion de contegnui e lengac, e les ge dèsc l met al vijitador de passèr fora 50 egn de storia de l’autonomia de gra al svilup de la competenzes toutes su col Secont Statut del 1972.
L percors, l porta dant na recostruzion cronologica di desferenc vèresch che à caraterisà chest mez secol de storia, estra che na lingia de grafics che deida a entener miec la crescimonia del sistem provinzièl. Element zentrèl de la mostra e de la “prejentazion” l é la testimonianzes de la femenes e di omegn che laora e che à lurà per la Provinzia, estra che di desferenc enc e setores che met adum l sistem. Vegn coscita metù dant n mosaich de stories personèles che se encroja co la storia più generèla de la istituzion, da olache l é possibol trèr fora l sens de partegnuda, l spirit de servije e la situazions che i l’à mudèda. Endrezèda desche n profil Instagram, patstories l podarà esser vardà ence tras chest social network. Tinultima, na dopia postazion la é dedichèda a la Sala Depero.
Se podarà veder chest percors dal lunesc al vender da les 9 da doman enscin mesdì e da la does a les 5 domesdì. L’area educativa de la Fondazion Museo storich del Trentin la porta dant vijites compagnèdes con prenotazion fata dantfora.
La instalazions
Apede la mostra, dai 5 de setember enscin ai 31 de dezember del 2022, per fèr festa per i cincanta egn del Statut l é stat projetà instalazions temporanes a forma de “A”, che stèsc per autonomia, che les vegnarà metudes ló da la entrèda prinzipèla de la Provinzia e de la Region te piaza Dante, autra les vegnarà metudes te strèda Manci, ló da la Presidenza del Consei Provinzièl, e te strèda Torre Verde, ló dal Consei de la Autonomies Locales.
Dal 1m de setember inant vegnarà enlumenà de color porpora i ciastie Thun, Stenico e Beseno e la loja veneziana del Ciastel del Buonconsiglio, che en lunesc ai 5 de setember, per chesta ocajion, la vegnarà orida debant per i vijitadores.
Grafica te l’enjonta
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
