Der Livio Gaeta va de universitat va Torino hòt vourstellt abia as geat pet de sproch van walser en Piemonte ont Aosta Tol, der hòt derzelt va de tschicht va de lokaln taitscha sprochen ont hòt sprochen paispiln gamòcht.
S hòt bolten enteressiart òlla de datn pònk CliMAlp as offet ist en òlla. Der Francesco Costantini va de Universitat va Udine ont der Romano Madaro va de Universitat va Trea’t hom klòfft va de taitscha sprochminderhaitn van Friuli. De hom klòfft va de bichtekait van mearersproch klòffen bavai der kopf gip der glaiche bèrt en de sprochen as der kennt.
Runt enteressant sai’ gaben de kuntschòftn va de learern va de earsteschual va Timau ont Sauris va de Carnia as en de jarder hom gamòcht materialn ver de lear van lokaln taischa sprochen.
De Federica Ricci Garotti va de Universitat va Trea’t ont der Leo Toller van Bersntoler Kulturinstitut hom derzellt abia as geat pet de unterstitzung va de sproch en Bersntol asou abia der learer va de Universitat va Trea’t der Ermenegildo Bidese ver sèll as keart en de zimbern. De presidenten van Bisschòft Lear komitat van Concilio va Suach va de Spagna de Jasone Cenoz hòt klòfft van prauchen va de sproch euskera, de basca sproch. De doi sproch ist kemmen verpiatn bail en franchismo ober hait nou leben ont as bòckst ont praucht en de schualn aa en an iatn livel.
Der trèff ist drinn gaben en an schouber va iniziativen ver za klòffen van bichtestn sochen as kearn en de lokaln gamoa’schòftn ver de sproch, gschicht, lait ont social ver an projekt as hoast se “De kròft va de minderhait: mòchen bider lem a kloa’s dorf pet taischa burzn en sud van Alpn”, zuazolt pet gèlt van PNRR.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
