Giovedì, 01 Settembre 2022 - 17:27 Comunicato 2649

Traduzione in mòcheno
Der To va de Autonomi: kan social Teater der vaierto heift u’ pet en konzert van coro va de Sat

En ma’ta as de vinva van leistagest um nai’na zobenz, pet vraier intritt, a mol raich va gschicht ont liab

Der Trentin ist an plòtz bou as de Mitteleuropa ont de mediterraneische sait pakemmen se, gèltsgott en de sai’ organizazion ist der guat za gem òcht en de naiekaitn, en de umbèlt ont en vernem va de sproch ont va de kultural identitet. De doi ist de gschicht va de inser lòntschòft ont van ausònder sèlberschòff as haier griast de visk jor van Zboate Statut va de Autonomi (1972-2022). S doi kimmp gatu’ durch an schea’n programm va naiekaitn schoa’ u’pfònk en hourneng ont as bart riven en ma’ta as de vinva van leistagest 2022 en To va de Autonomi. Benns um oa’dleva en de vria der provinzalsitz as steat en Dante plòtz bart innlònen de durchaus austell “De Provinz tuat se derklorn. A roas zbischn de gschicht va de trentinische autonomi, hait ont morng”, um nai’na zobenz der social Teater va Trea’t bart innlònen a mol raich va gschicht ont va liab pet de derstelln van istituzionen va de autonomi. Der programm hòt vour za gem der prais pet en horjoch van Haile Venceslao ont der konzert van Coro va de Sat-Schòft van tridentin alpinistn, ver za derzelln durch de musik aa der pint zbischbn de pèrng ont de trentinische lòntschòft. De toalnemm ist offet ver òlla finz as plòtz hòt.
"La Provincia si racconta": le installazioni temporanee progettate per la "Giornata dell'Autonomia" 2022 [ Archivio Ufficio stampa PAT]

Der programm vonk u’ pet de beirter van president van provinzalrot va de autonome provinz va Trea’t, van president van rot van lokaln autonomi ont van president va de autonome Provinz va Trea’t.

Derno der prais pet en horjoch van Haile Venceslao en Günther Platter, Haupmònn van Tirol van 2008. Der Platter hòt 68 jor, er hòt ver an ettlena jor gaòrbetet abia drucker ont derno abia beamter va gendarmeri. Bail de òchsker jarder hòt er u’pfònk de politik òrbet, earst abia consiliar ont derno abia pirgermoaster va Zams en Tirol. Der ist gaben toalnemmer van tiroler Regiarung van 2000 ont der ist gaben federalschutz ont innbende minister van Osteraichische Republick.

Derno der haupderstellt van trèff bart sai’ der Coro va de Sat, as hòt nèt noat za kemmen vourstellt. Der hòt se zòmmgaleik ka Trea’t as de 25 van moi 1926 pet en nu’m va Coro va de Sosat, derno ist der kemmen gabèckslt pet en nu’m va Coro va de Sat en de draisker jor. De hòm tsungen ver en earste vòrt en groas Sol kan schloss van Buonconsiglio. Iberearstn ist der kemmen regiart van Enrico Pedrotti finz en jor 1938 derno van Silvio Pedrotti ver mear abia visk jor, iaz van Mauro Pedrotti der nef van Silvio ont su’ van Mario. Der coro hòt tsungen ver mear abia tausnt konzertn en Balschlònt, en Europa (Osteraich, Belgio, Tschèchlònt ont iaz Tschèch Republick, Danemark, Finland, Fronkraich, Taischlònt, Englònt, Niderlònt, Russlònt, Schbaiz), Amerika (Brasil, Kanada, Messiko, Stati Uniti) ont Asia (Korea), en de gilteger teatern. Vil de vert as sai’ kemmen tsungen de draihundert liader van plan, van sèlln van 1933 finz as de leistn gamòcht va Fondazion van Coro va de Sat (nai’n cd ont an topplete cd pet mear abia zboahundert liader van 1996 finz en 2015).

Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(Traduzione a cura dello Sportello linguistico della Comunità Alta Valsugana e Bersntol)

(cdt)


Immagini