De austell
Haier bart se hòltn s vaier van visk jor van Zboate Statut va Autonomi ont de austell as bart plaim “De Provinz kontart se”, gamòcht va de Fondazion Museum va de gschicht van Trentin, de austell bart hom en rif za kontarn de gschicht, haisegento ont zukunft va de autonomi va de Provinz va Trea't. De austell bart sai' austoalt en saitn ont innstallazionen ont s bart sai' en earste stock van sitz en Dante plòtz, za vongen u' va de earste tir bou as men geat aninn finz en salel Winkler.
“De Provinz kontart se” s ist an projekt offet en vernaierung as barn kemmen, s bart vourstelln en de lait as schaun zua an schouber va enteressanteta sochen ont sprochen as long sechen visk jor va gschicht va de autonomi turch s vernaiern ont s enviregea' pet en Zboate Statut en 1972.
En u'vong va de austell bart men sechen zait ver zait bos as ist passiart bail de jarder van doi hòlb hunterter va gschicht ont nou a toal pilder ver za laicht verstea' abia as gabòcksn ist der provinzal sistem. Zentral soch va de austell ist s “kontarn” va mander ont baiber as hom oder tea' nou òrbetn en Provinz, oder en òndra dinstn as toalnemmen òlbe va de provinz. S mòchen toal an iat s van an mosaik va eigena gschichtn as zòmm mòchen de general gschicht va de istituzion. S bart sai' meglech sechen s stolz van hearn se toalmòchen ont s guat òrbetn no de bècksl as hòt en de jarder gop. S doi kontarn bart kemmen gamòcht abia ver de saitn va Instagram, patstories bart sa hoasn ont men bart s sechen van social network va de Provinz. A toppleta sait bart kemmen galòck en de Sol Depero.
De austell bart men sa meing sechen van ma'ta finz en vraita va um 9 finz um 12 en de vria ont um 14 finz um 17 nomitto. De Fondazion Museum va de gchicht van Trentin bart mòchen no za u'melln se, de guide va de austell aa.
De installazionen
Zòmm pet de austell, va de 5 van leistagest finz as de 31 van schantonderer, ver za vaiern de visk jor van Statut sai' kemmen gamòcht zaitinstallazionen abia groasa “A”, abia Autonomi, as barn kemmen galeik vour de earstetir va de Provinz ont va de Region en Dante plòtz, a toal òndra galeik en via Manci ka de Presidenz van Provinzalrot, ont en Via Torre Verde, kan Rot va de Lokaln Autonomi.
Van earste van leistagest barn kemmen pet de liachter onderst gamòcht de schlesser Thun, Stenico ont Beseno ont de venezianen loggia van Buonconsiglio Schloss as bart sai' òffet ont vrai ver en gònze to en ma'ta as de 5 van leistagest.
Derzua de grafica
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(Traduzione a cura dello Sportello linguistico della Comunità Alta Valsugana e Bersntol)
