Giovedì, 29 Giugno 2023 - 08:48 Comunicato 1936

Traduzione in mòcheno
De zòmmòrbet zbischn de sitzn ont de elementn van Unesco as en Trentin sai’ vònk u’

Sitzt vour Der vicepresident ont asesor va de umbèlt Mario Tonina

De sai’ vil en Trentin de sitzn ont de elementn as sai’ kemmen derkennt van Unesco, de Organizazion van Zòmmstòttn ver de U’lear, de Bischòft ont de Kultur. Men geat van Dolomitn Pahalter van Unescomentsch, as s ist kemmen derkennt en 2009, finz en a toal universitetn leartischer inntschrim en Programm van Unesco Chairs. De provinzal Junta, pet derlab vourtschbunnen van vicepresident ont asesor va de umbèlt Mario Tonina, hòt u’gaheift a zòmmòrbet as zòmmpintet mearer sektorn va de provinzal Amministrazion ont a greasera sinergi zbischn de Provinz ont de dinstn zuaganommen, ont nou an meing klòffen pet de stòtt ont internationaln istituzionen. De zòmmòrbet ist regiart van asesor Tonina as der kennt se aus van projekt “Dolomitn pahalter van UNESCO” (ont pet ibergemkòrt van iberòll viarer van Dipartiment as keart zua). S barn toalnemmen solderearstn de derstelltn as iberschaung van dinstn ont van elementn as sai’ en Trentin, derkennt en de programm van Unesco. Der dinst van pahòltlechkaitgreas ont van platz tschutzt bart no stea’ en de òrbetn va sakretariat ont va zòmmòrbet. 

En doi moment en de provinz va Trea’t sai’ kemmen derkennt van Unesco de doin sitzn ont elementn:

- Dolomiti Dolomiten Dolomites Dolomitis, inntschrim en 2009 en de Lista va de Unesco Umbèlt pahalter;
- Urstorische sitzn van stònghittn as de alpn, inntschrim en 2011 en de Lista va de Unesco Umbèlt pahalter;
Adamello Brenta, inntschrim en 2008 en de umbèltnètz van Geoplatz van Unesco;
- Riserva di Biosfera Alpi Ledrensi e Judicaria va de Dolomitn asn Garda, inntschrim en 2015 en Programm Unesco Man and Biosphere;
- Cattedra Engineering for Human and Sustainable Development, Universitet va de u’lear va Trea’t, inntschrim en 2011 en Programm Unesco Chairs;
- Cattedra on Anticipatory Systems, Universitet va de u’lear va Trea’t, inntschrim en 2013 en Programm Unesco Chairs;
- Club Unesco va Trea’t, inntchrim en 2011 en de balsch Federazion van Vraischòftn ont Club ver en Unesco.

En 2021 ist kemmen vourstellt a vrog ver za kemmen derkennt van Club ver en Unesco va Lavarone Forte Belvedere-Gschwent ont Alpe Cimbra.

Ver en sèll as keart de sèlln as miasn drauschaung van pahalter Unesco, as sai’ as de provinzal lòntschòft sai’: de Autonome Provinz va Trea’t ver de Dolomitn Unesco bou as de Provinz ist der grunttoalnemmer; de Ouberregiar van kulturalpahalter ver de trentinische sait van Urstorische sitzn van stònghittn as sai’ as de alpn; der Naturalplòtz Adamello Brenta ver en Geoparco Adamello Brenta; der Pèrgrengpòch (Bim) van Sarca ver de Riserva va Biosfera van Alpn Ledrensi ont Judicaria van Dolomitn asn Garda.

Abia as s kemmen drautschauk de u’leartischer Unesco ont der Club Unesco, as sai’ en provinz va Trea’t, de sèlln as ompòrt gem sai’ de omtn ont de vraischòftn as zuakearn.

Prope bavai as en Trentin hòts mearer sitzn ont elementn derkennt pet de sai’na drauschauer, ist kemmen tschbunnen za gem de moglechkait za tea’se klòffen ont oa’ne leing se ver za meing guat envire gea’ òlla zòmm, ont asou mòchen zòmm a toal projektn. De Junta hòts es tschòffen en vraita as de 16 van prochet ont s bart kemmen gaholven va de Schual ver en lònt ont ver de lòntschòft va TSM.

Ibersetz gamòcht van Sprochtirl va de Tolgamoa'schòft Hoa Valzegu' ont Bersntol

(cdt)

Fonte: Ufficio Stampa

Versione Stampabile

Immagini

Visualizza

Potrebbero interessarti: