Pròpio vor bintsche tang dar autonome Provìntz vo Tria izzar khent zuargètt vodar Presidentz von Minister Rat di vornaugarum von protokòll vor in prodjèkt auzolega klassi dupplzung in Toalinstitut Trento 2, boda sa, sidar mearara zait, hatt ågestèllt tirolare maistre in di schual vo Cognola.
In okasiong von 20 djar vo disan prodjèkte augelekk zbisnen Trentino un Tiról, dar vorsitzar von Euregio Arno Kompatscher khütt ke di Euroredjong iz da djüst kornìs vor sött prodjèkte: “Sidar zbuantzekh djar dar prodjèkt gitt zuar z’arbata pittnåndar übar di grentze. Disa kooperatziong disa edukatìf arbat gemacht pittnåndar, boda di stòrdja, di kultùr, di identitét un di zungen von Euregio soin dar hauppunkt, helvan zo pinta no mearar in Euregio un un vüarn vür da européan integratziong”.
Dar haupmånn von Tiról Anton Mattle o izzese kongratulart un hatt untarstricht di bichthait vo disan edukatìf prodjèkte boda khemmen gemacht übar di grentze: “Durch dise zung, sportìf un kulturàl trèff, di schüalar un di maistre mang auzbetarn soi kulturàl identitét un vorstìan di stòrdja bodase pintet. Ditza trakk vürsnen an européan idea boda boroatet di naüng djeneratziongen zo leba in a european Redjong”.
Edukatziong durch di grentzan
Dar prodjèkt hatt ’z zil auzzobetra daz sèll boda seng maistre un studjént, machanten khennen metode zo lirna vo poan in saitn von Prènnar. Daz gelaichege iz vor da kulturàl auztausch boda zuargitt zo khennase tra de se. Di tème boda soin khent auzgeredet daz vorgånnate schualdjar zoang biavl da soin di argoméntn tratàrt: ma geat von fabln un stördjela sin afte emerdjéntz dianst.
Di Cornelia Hagele, Istrutziong Minister von Tiról, untarstraicht bia bichte ’z iz ditza auztauschan un disa kooperatziong übarhaup pròpio vor bazta ågeat di istrutziong: “Vennense übar di natzionàln konfìn un khennense garade ummaz pinn åndar soinz bichtege eleméntn boda zuargem z’arbata pittnåndar drinn in da européan Redjong Tiról-Südtiról-Trentino. Da européan Pintom hèft å vo ünsarn khindar, un dena daz earst vo allz vodar istrutziong.
Dar prodjèkt auzzotauscha zbisnen Tiról un Trentino
In schualdjar 2001/2002 disa kooperatziong iz khent augelekk pittnåndar von tirolar un von trentinar Dipartimént vor di Istrutziong. Dar rècht grunt iz khent gelekk pittnan protokòll untarschribet zbisnen in zboa lentar. Vor di trentinar mangda nemmen toal in progråmm di maistre un di profesör vo taütsch vodar untarschual un vodar mittlschual. In Tiról mangda nemmen toal alle di maistre boda arbatn in di schual obligatòresch (untarschual, mittlschual, politecnico un spetziàl djeneral schual) boda khennen daz belese.
Di edukatìf prodjèkte von Euregio,
zbisnen Tiról un Trentino darzuar disan boma khött da soin mearare: baispil dar konkors “Euregio macht schual” boda zuargitt in studjént boda håm zbisnen in 7 un in 14 djar zo arbata pittnåndar. Di djungen von 16 sin afte 19 djar mang khennen di kultùr, di zung un di stòrdja von soin lentar nemmante toal in Festival von djungen von Euregio.
Alle di prodjèkte boda ågian istrutziong un nåsüach makmase vennen afte websait von Euregio:
https://www.europaregion.info/it/euregio/progetti/istruzione-ricerca/
Übarsetzt von Schaltarle vor di zung von Toalkamou vodar Zimbar Hoachebene
