“I khü no vorgèllzGott in pürgermaistarn nidar nåmp – izta gånt vürsnen zo khöda dar Fugatti – in vorsitzar vodar Provìntz vo Vicenza, Andrea Nardin un alln in sèlln boda håm geholft zoa azta dar bege mage bidar soin offegetånt.
I gedenkh garècht in ångst un di telefonade in di sèlln sbern moméntn, ombrómm aftna sait hattma lai vorstånt ke di lüa iz gest groaz un aft d’åndar ke di arbatn beratn nèt gest dèstar. Bar håm gebettet zo tüana offe vor in tage vodar Madònna vo ditzembre un ankunto dar arbat von öffentleschen vüarom un von firme von privètt haüt mabar offetüan da turistìk stadjong von ünsarn lentar åna pensìarn”.
Auz pa disan månat, asó azpe da håm gedenkht dar diridjént Luciano Martorano un dar direktor von arbatn dar inz. Paolo Nicolussi Paolaz, atz 21 von bintmånat soinda khent gemacht springen schiar zboatausankh mètre kube kròtz boda iz gest nå no abezovalla aftn bege. Daz sberarste iz gest håm asó bintsche zait. Ma hatt nèt gebizzt, defàtte, baz ’z berata vürkhent aftn bege, boda sa iz gest geschedeget vodar lüa, balma hebat gemacht springen in kròtz boda iz gest obar un boda hebat bidar gemacht valln drau no åndarn matardjàl. In bintsche tang izta khent augemacht a maur vo schiar hundart mètre un soinda khent gelekk schiar åndre hundartunvürtzekh mètre spèrrn auzohalta di khnottn boda spetar beratn khent vortgenump.
Dar vorsizar vodar Provìntz vo Vicenza Nardin hatt khött ke an arbat gemacht in asó bintsche zait zoaget ke di politika funtzionàrt un iz guat zo geba risposte in pürgar, dar pürgarmaistar vo Folgrait Michael Rech un dar vorsitzar von Toalkamòu vodar Zimbar Hoachebene Isacco Corradi håm poade untarstricht bia disa arbat, boda hatt zuargètt bidar zo magase pintn zbisnen Trentino un Veneto, habe gerettet da bintar turistìk stadjong boda senonda berat gånt vorlórt, (dar Veneto iz dar earst markà vor ditza vor da Zimbar Hoachebene) ma darzuar dar bege iz bichte vor alle di sèlln arbatar boda alle tage gian nidar un au zbisnen in zboa provintzàn.
Offe dar bege di arbatn bartn gian no vürsnen vor a par månat. In di tang boda khemmen bartnda khemmen nidargelekk di spèrrn auzohalta di khnottn un barta khemmen gesotzt dar matardjàl au hoach in pèrge sèmm boda iz partìrt di lüa.
Intervista in vorsitzar Fugatti
Intervista in Andrea Nardin vorsitzar vodar Provìntz vo Vicenza
Intervista in Isacco Corradi vorsitzar von Toalkamòu vodar Zimbar Hoachebene
Intervista in Michael Rech pürgermaistar vo Folgrait
Du mast abenemmen di video iìun di service da
https://drive.google.com/drive/folders/1cOFwUPk2rcBrO6CVEIlGvwL8iZGhoiaw?usp=sharing
Übarsetzt von Schaltarle vor di zung von Toalkamou vodar Zimbar Hoachebene
