Iader stickl va der bersntoler gamoa’schòft ist kemmen envirtrong en studio van Giacomo Tomasi va der RAI zòmmen pet de Claudia Marchesoni ont en Leo Toller van Bersntoler Kulturinstitut ont òll vòrt, noch en argoment, sai’ kemmen inngalont auskenneta lait oder lait van lònt. Dòs de argomentn van stickler: eppes as de minderhait ont de sproch; der hòndln van krumer, de kocherai, de sproch, de vosnòcht; Robert Musil ont s tol; de bèlt as man stellt n vour; de schual; de kloa’n fruchtn; minerai ont gruam; de architektur. Ver de bersntoler gamoa’schòft hom zuagaholven: Barbara Laner, Tiziana Moltrer, Federica Ricci Garotti, Martin Toller, Giorgia Decarli, Roberto Moltrer, Paolo Ferretti ont Roberto Pezzato.
Gònz schimlet sèll as de zimbarn gatun hom, òlbe pet en Giacomo Tomasi en studio zòmmen pet de Elena Nicolussi Giacomaz ver en Zimbar Kulturinstitut. De roas ist upfònk pet Fiorenzo Nicolussi Castellan, gschistlecher ont kulturaleter mithèlver van KIL, as hòt bolten klòfft va bou as kemmen tea’ de zimbarn, va der bèlt as man stellt n vour ont, en leist stickl, zòmmen pet en Leo Toller van KIB, va abia bersntoler ont zimbarn glaichen se. De òndern stickler hom klòfft van museen va Luserna, va abia as de sproch gamit ist, van gasetzn as stitzn de drai sprochminderhaitn, va bos as tuat de Autoritèt ver de sprochminderhaitn. Vil zait ist kemmen galòt en telegiornal Zimbar Earde ont en de druckprojektn van Institut, en de rezeptn va der tradizion, en de jungen zimbarn ont en abia as de u’gahènk sai’ en lònt, en schualprojekt 0-6 “Khlummane Lustege Tritt” ont, en leistn, de austell van museo Lusèrn “BURTZAN. Stordje va baibarn, arbat un pèrge”, “RADICI, storie di donne, di lavoro e di montagna”. S hom zuagaholven Elena Nicolussi Giacomaz, Fiorenzo Nicolussi Castellan Galeno, Matteo Nicolussi Castellan, Maura Bello, Luca Zotti, Simone Nicolussi Neff, Gabriele Agostini, Katia Nicolussi Moz Chelle e Roberta Bisoffi.
Do der link as Rai Play Sound
Ibersetz van Bersntoler Kulturinstitut
