Sin atz haüt in di Provìntz voTria soinda khent darkhennt Unesco dise saitn un elementn:
- Dolomiti Dolomiten Dolomites Dolomitis, inngeschribet ’z djar 2009 in di liste Bèlt Schatz Unesco;
- Di hüttla atz bazzar von uraltn zaitn von Alpm, inngeschribet ’z djar 2011 in di liste Bèlt Schatz Unesco;
- Adamello Brenta, inngeschribet ’z djar 2008 in di bèlt Nètz von Geopark Unesco;
- Resèrv Biosfera Alpi Ledrensi un Judicaria von dolomittn sin aftz Garda sea, inngeschribet ’z djar 2015 in progråmm Unesco Man and Biosphere;
- Cattedra Engineering for Human and Sustainable Development, vodar Universitét vo Tria, inngeschribet ’z djar 2011 in progråmm Unesco Chairs;
- Cattedra on Anticipatory Systems, vodar Universitét vo Tria, inngeschribet ’z djar 2013 in progråmm Unesco Chairs;
- Club Unesco vo Tria inngeschribet ’z djar 2011 in da Belese Federatziong von Feroine un Club Unesco.
’Z djar 2021 izta khent inngètt dar vorsch z’soina darkhennt in Club Unesco vo Lavròu Belvedere-Gschwent un Alpe Cimbra.
Vor bazta ågeat nåzostiana in geplèttra Unesco boma vennt in ünsarne lentar: da autonome Provìntz vo Tria vor Dolomiti Unesco vürgevüart durch di Stiftung Dolomiti Dolomiten Dolomites Dolomitis Unesco vo disarn Stiftung di Provìntz iz da earst grunter; di Sopraintendentz vor daz kulturàl geplèttra vor bazta ågeat di hüttla atz bazzar von uraltn zaitn afte Alpm; dar Naturàl Park Adamello Brenta vor in Geopark Adamello Brenta; dar Bacino Imbrifero Montano (Bim) von Sarca vor di Reserv vo Biosfera Alpi Ledrensi un Judicaria von Dolomittn aftz garda Sea.
Vor bazta ågeat di Lirnstüal Unesco un di Club Unesco, bodada soin in Provìntz vo Tria berdada nåsteat soin di emtar un feroine bodase håm augelekk.
Segante ke in Trentino soinda alle dise saitn un elementn darkhennt un alle dise emtar un feroine boda arbatn vürzovürase, hattma übarlekk aztada saibe mångl zo legase panåndar zo maga arbatn pezzar un pittnåndar atz mearare sachandarn un süachan zo macha prodjèkte boda innvången mearare vo disan realtét. Ditza iz dar koordinamént boda iz khent augelekk vodar prvintziàl Djunta an vraita 16 von prachant boda bart soin någeholft in sèll boda mocht khemmen getånt vodar Schual vor in Teritòrdjo un di auzseng vo TSM.
Übarsetzt von Schaltarle vor di zung von Toalkamou vodar Zimbar Hoachebene
