Dar vorsitzar vodar autonome Provìntz vo Poatzan hatt khött vorgèllz Gott in alt vorsitzar vor di arbat gemacht pittnåndar in dise lestn zboa djar. Pinn spruch “gian übar di konfìn” geata vürsnen di mittarbat pittar südtirolar vorsitzarung. ’Z soinda in prgråmm naüge prodjèkte zo nempra di pürgar in Euregio, zo pinta di laüt un apunto zo giana übar di konfìn. Vor earst arbatn pittnåndar vor ziln boda gian guat vor alle schaugante zuar dar Europa haltante kunt von laüt boda lem in Euregio. Soin guat auzohaltase saiz vor bazta ågeat ’z lem von laüt saiz vor di ekologesche un ekonomege problème iz daz earst sachan boma mocht haltn kunt; ditza iz dar Euregio machan auvarkhemmen un vürleng an uantzega vorstèllung vor in gåntz storege Tiról: vor in naüge vorsitzar a prodjèkt von laüt nèt vodar politika.
Dar låntshaupmånn von Tiról hatt khött vorgèllz Gott in trentinar vorsitzar un alt vorsitzar von Euregio vor da guat arbat gemacht in soine zboa djar vorsitzarung, gedenkhante ke ’z soinda khent getånt sachandarn sa sperimentàrt un åndre anvétze gåntz naüge azpe dar Campus Euregio atz Innsbruck, dar konkors vor di schualn gehoazt "Euregio fa scuola" un dar EuregioLab boda hatt vürgelekk initziativan zo macha pittnåndar in européan Forum vo Alpbach. Arbatn pittnåndar nempart di laüt atz poade di saitn von Prènnar un dar Südtiról asó mage sterchan no mearar soi mittarbat pittar åndarn sait vodar grentze.
Auz pan morgas dar alt vorsitzar hatt gezoaget dar Djunta di arbatn gemacht von Euregio ’z djar 2023. Dena izta khent ågenump dar arbat Progråmm vorz djar 2024. In di lestn zboa djar 2021-2023 dar spruch von Euregio iz gest “dar Euregio iz djung” a spruch boda hatt geböllt soin gemuant ke, in alle di prodjèkte un in di vil initziatìvan vürgelekk, di djungen soin dar zentrum, sterchrante asó no mearar in Euregio sèlbart un darzuar nemprante no mearar di laüt von drai lentar. Pasarante di vorsitzarung von Trentino in Südtiról dar Euregio bart allz ummaz vürgian auzonemmanen bichtege sfide in di zboa djar boda khemmen: übar dar klimatege umbèkslom, übar daz sèll boda håm mångl di laüt, aftaz mengln vo spetzializarate arbatar, afta sotziàl glaiche, afte gelaichegen oportunitét, zo redjra in balt un di groazan vlaischvrèzzar. Åna hintarzolazza di mittarbat übar dar zivìl schütz, dar kultùr, dar imprenditorì, in turismo un in spòrt.
Dar alt djeneràl sekretardjo hatt gedenkht ke disar tage iz nèt lai di ent vonan toal trentinar bege, ma dar ånfång von bege vodar autonome Provìntz vo Poatzan. Dar izzese khött kontént von zboa djar un übarhaup von lestn månat boda håm gevüart zo macha verte ettlane arbatn. Dar naüge vorsitzarung khintar gelatt a bichtega eredità boda hatt gelatt an Euregio mearar darkhennt un djung. Di mearare sfide boda bartn vürkhemmen bartn soin ågenump legante panåndar di ziln von lentar.
’Z hatta gegrüazt di Djunta un di Vorsåmmelung dar pürgemaistar vo Molvén o. in tages auz nå in sea soindase gevuntet di schüalar un di istrutör von pompìarn von distrìkt vo Mezzolombardo boda håm gezoaget daz sèll bosa soin guat zo tüana, dar tage izzese gemacht verte pinn khindar vodar untarschual “Luigi Nicolussi" vo Molvén von Komprensìf Institùt vo Mezzolombardo boda håm gesunk atz belesch un atz taütsch in “Ode an die Freude” in Ode vodar Européan Uniong zo mercha di tschelle boda pintet di euroredjong sidar azze iz khent augelekk.
Foto un film von Press Åmt.
Übarsetzt von Schaltarle vor di zung von Toalkamou vodar Zimbar Hoachebene
