Zboa mode z’sega daz gelaichege sachan, zboa stòrdje bodase trèffan åna zo vennase.
Zboa sealn zbisnen gedenkh un gehöara. A baibe un a månn boda kontàrn in lust zo haltase gearn un daz sèll bosa anvétze haltn vorporget züntrest dar seal, bia bichte ’z iz zornìrn daz djüst un dar lust zo venna rue. An uantzegar disenjo nidargelekk auz nå dar grentze vor un dòpo in Earst Bèltkriage. Zboa tagepuachan gånt vorlórt un bidar gevuntet soin dar van boda pintet di stòrdje boda khemmen kontart in schauspil. A modo zo kontàra da gelaichege stòrdja gesek voanan baibe un vonan månn, zboa saitn geschribet drinn in groaz puach von Earst Bèlkriage.
Allz khint auz von sovl un sovl stòrischen gedenkh, von tagepuachan von soldàn, von lettarn boda soin khent geschribet von frönt dahuam, von lem von lentar boda soin gest nåmp in fört. Ditza khint gezoaget durch a poètische arbat drinn in khlång un inar musìk boda innvången un vüarn vort bait in di zait. A dialog boda pintet berda redet un berda steat z’schauga un boda macht höarn alle toal von schuspil, boda laise dekht abe alle di töala vodar stòrdja un macht höarn starch di kraft von börtar.
In tage darnå, an sunta 6 von bimmat (di drai in tages) aft fòrte Sommo Alto vo Folgrait barta soin anvétze Di vraun von zimmen. Stòrdje vo alpinisten un von sèll bosa håm getånt an arbat vodar Manuela Fischietti, aftn palko pittnåndar pittar Federica Chiusole. A produktziong vo Rifiuti Speciali.
Di vraun von Zimmen. Stòrdje vo alpinisten un von sèll bosa håm getånt iz a schauspil allz drinn in di kantzü gesunk von Kòro Sant’Ilario vo Rovrait. Boda sink kantzü von pèrng. A stòrdja boda bill gedenkhan sèks baibar protagonisten vo groaze adventùrn, boda bill machan khennen in schütz boda alle se håm gett in pèrgstaiga von Beleschlånt un vodar bèlt. Baibar boda soin gånt kontra dar kultùr von pèrng boda hatt hèrta geböllt azta di baibar stian hèrta an tritt hintar in månnen, se anvétze, soin gerift vor earst aftz bichtege zimmen un håm offegetånt naüge “vie”: Henriette d’Angeville, Gertrude Bell, Mary Varale, Nini Pietrasanta, Renata Rossi un Serena Fait. Sèks baibar zornìrt allz vortretar vo ploaz åndre boda von lestn djar von achthundart sin in ta’vo haüt håm gètt soin schütz inan spòrt boda vor långa zait iz hèrta khent gehaltet lai eppaz vor di månnen. Durchzovüara di stòrdja vo disan baibar un von sèll bosa soin gest guat zo tüana soinda di kantzü zornìrt un gesunk von schümman stimmenn von Kòro vo Sant’Ilario. ’Z schauspil iz khent abegenump von puach vodar Chiara Todesco Le Signore delle cime, gezoaget in da 67ane editziong von Trento Film Festival.
Informatziongen
Zo nemma toal (alle di trèff soin åna z’zala) iz pezzar meldense pellar. Dar progråmm magat khemmen gebèkslt azta berat schaülaz bèttar.
Zo bizzasan mearar übar in gåntz progråmm un bia zo maga nemmen toal iz genumma gian afte websaitn www.centrosantachiara.it, www.cultura.trentino.it e www.museostorico.it .
