De sitz van museum as lòng ens pesser kennen de Zimber, de Ladiren ont de Bersntoler, sai’ lebet, offet en de aigene gamo’schòft ont de tea’ nèt lai hiatn ont gilt gem en bèrt van storische-praich, ober de sai’ guat za vernaiern de vourtschbinnen ont de virm za lòng sechen de ausstelln.
Ladinische museum va Fascia
Va dòs ist an raicher paispil der Ladinische museum va Fassa, etnografische goltbèrt ont raich pahalter ver de gschicht, ver de praich ont ver de tròchtn va de kultur van ladiner, as guat ist za vourtschbinnen ont vinnen ausòndra virm za stelln vour de museum, abia zan paispil der virtual vurm za lòng sechen s vourgschichtdorf van I Pigui (“Pigui Experience” mèlln se as de sait www.istladin.net/it/368 ).
Der Museum (offet van sunta asn vraita va um zeichena en de vria finz zamitto ont va um drai finz um sima zobenz), zòmm pet de Ladinische Bibliotek mòcht toal van Ladinische Kulturinstitut “Majon di Fascegn”, s “haus van fassani”, as derstellt abia as augòngen ist de ladinisce gamoa’schòft, benn as sai’ kemmen pfuntn de earstn archeologische vinn finz en de zaitn as ber lem tea’, durch a roas as lòk sechen de òrbetn, de zivil ont kirchliche praich, a’ne vergessn de kunst ont de glaichzait as s ist an punkt va u’vòng van a etnografische stros as ausknopftze durch de kultur van gònze Fassa Tol, zòmm pet de mil, de uròlt sog, van casino va bersaglio, ont de ausstelln as kearn de kaserai, de lòntschòft ont s Groas Kriag.
Ont nou, durch a zòmmòrbet van an projekt pet de Fondazion Dolomiti Unesco, der ladinische Museum finz as de nainzena van agest stellt vour de ausstell “Franz Dantone (1839-1909) fotografer van Dolomitn: s augea’ van a u’mbirklechkait”.
Vrog: www.istladin.net/it
Bersntoler Museum
En Palai en Bersntol, der kulturinstitut stellt vour de stende ausstell as de taitsch bersntoler gamoa’schòft as men konn untersuachen òll to as de vifzena van agest aa (va um zeichena en de vria finz zamitto ont va um zboa finz um viara nomitto).
Glaim en lòntkòrtn, dokumentn ont pilder as de gschicht va de gamoa’schòft, kònn men schaung s bèrkzaig as kearn s lem va òll to, abia de kospn, as sai’ de holzena schua, oder de kraks, as s ist der korb as men praucht hòt ver za gea’ za verkaven va haus en haus bail en jorzaithòndln.
Men kònn vinnen aa ònders zaig as toalmòcht van pahalter van bersntoler, abia der krònz, as s ist der huat as hom u’galeik de koskrittn, oder de Stela, as s ist an groasn stern as de singer trong hom va hoff en hoff bail de bainechtzait. En groas sol van Institut, kònn men aa pasuachen de ausstell “Klòffen, sprechen, parlare”, as durch de dokumentn, de pilder ont de kuntschòftn lòk sechen de sòchen as kearn en a sproch, abia aigene ont zòmm kulturalpahalter.
Der museum Filzerhof aa, as haier vaiert de sai’na simhundert jor va benn as der ist kemmen aupaut, lòk ens schaung de aigenhaitn van lem va òll to va de familia van a vòrt. Der hoff stellt vour integral zimmern - de kuchl pet en vaier as s ist kemmen u’gamòcht en de dru’ ont aa de kuchl pet an heart, a hairatzimmer ont an oa’zegezimmer, ont nou der stòll ont de teitsch - aupaut en de leistn jarder van simhundert ont as bail de jarder hom tsechen de bècksln van familie as hom en drinn galep. De viarung sai’ bail en mu’net va agest òll to va um zeichena en de vria finz zamitto ont va um drai finz um vinva ont a hòlbs zobenz.
Vrog: www.bersntol.it
Museum Lusérn
De ausstell as haier ist kan Museum Lusérn van Zimber Kulturinstitut “Billz gegrés un biar – Billa pflònzn ont biar” as s ist der rirf van a ganuega ont liablecha suach van gadenkn ont van bissn van a gamoa’schòft, ver za derhòltn ont mòchen kennen de nutzn van billa plònzn ont van sai’nega zimbresche nam. Dernem en de jorausstell, ist moglech untersuachen de tauerausstell as derzellt de gschicht ont de praich va de zimber gamoa’schòft va Lusern ont va de lòntschòft as keart en umadum, pet de soln as schaung lòng s earste vourgschichtlem, de tròcht van ackerle, de vicher van plòtz ont de scheila sòchen van Groas Kriag as bolten tschlong hòt Lusern.
Der Museum ist offet as de vifzena van agest aa va um zeichena en de vria finz zamitto ont a hòlbs ont va um zboa finz um secksa zobenz.
Òlbe en dorf, kònn men untersuachen òll to s haus museum “Haus von Prükk” (va um zeichena en de vria finz zamitto ont va um zboa ont a hòlbs finz um vinva ont a hòlbs) ont de kloa’ pinakotek en gadenk van an pakonntn su’ va Lusern, Rheo Martin Pedrazza. Ont nou bail as men geat zavuas asn staig durch en dorf, kònnt men gea’ kan Forte Werk Lusérn (offet va um zeichena en de vria finz um viara nomitto benns nèt scheila bètter ist) as finz en earste to van leistagest hòts de ausstell van letratn “De kriaggrez as de balder” van Andrea Contrini, as vourtschbinnt de pilder va de lòntschòft bail s Groas Kriag ka Lusern ont en Vezzena.
Vrog: www.lusern.it
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
