Academia del Euregio: se rejona de Autonomia e Second Statut
Lunedì, 22 Agosto 2022 - 19:38 Comunicato
2536
Traduzione in ladino
Academia del Euregio: se rejona de Autonomia e Second Statut
A Alpbach, tel Tirol, joegn se met a confront con esperc dintornvia la storia e l davegnir de l’Autonomia
Trei fins de setemèna, trei raions, trei lengac, tropes i argomenc e la personalitèdes de gran enteres: chesta l é l’Academia del Euregio, che dal 2015 vigni doi egn ge sporc ai joegn anter i 18 e 35 egn la oportunità de cognoscer a fon, tras spezifiches seminaries, i fondamenc e i argomenc zentrèi del Euroregion Tirol-Sudtirol-Trentin. Chest an, chi che à tout pèrt a la edizions passèdes, i se à scontrà a Alpbach per n aprofondiment en cont de “50 egn del Second Statut de Autonomia: Angern. Anché. Doman”.
Do esser stac touc dant da Andreas Eisendle del Euregio, l é stat i intervenc de Hans Karl Peterlini del'Università de Klagenfurt, de Esther Happacher del'Università de Dispruch, del veie governator tiroleis Wendelin Weingartner e de Roberto Toniatti del'Università de Dispruch e Trent. La scontrèda la é stata portèda dant da Günther Rautz del Istitut Eurac per i deric de la mendranzes.
Una lezione nell'ambito dell'Accademia dell'Euregio ad Alpbach [
Archivio_Euregio]
En jebia ai 18 de aost domesdì l é stat endrezà i workshop en cont de “I besegnes de reforma de l’Autonomia. La esperienzes de la Convenzion del Sudtirol e de la Consulta”. I joegn i à fat na enrescida en cont de federalism comparà co la soravèrda de Elisabeth Alber del Istitut Eurac e da Jens Woelk del’Università de Trent. La dì la é stata serèda su co la proiezion del film “Alto Adige – Diviso tra le lingue”, de chel che i à descoret dessema co la giornalista de ORF Ines Pedoth. Coche l é stat dit dantfora, l event l é jit inant enscin en domenia ai 21 de aost, co la giornèda del Tirol, endrezèda tel program del European Forum de Alpbach.
Enjontà: l program
Foto del Euregio
Traduzion di Servijes Linguistics e Culturèi del Comun general de Fascia (Traduzione a cura dei Servizi Linguistici e culturali del Comun general de Fascia)
