Da soin romai mearar baz 900 di “pürgar” vo disan virtuàl lånt boda bill khemmen z’soina a platz bodase vennen zo lega panåndar daz sèll bosa bizzan un khånen alle di sèlln bodase höarn trentinar in da gåntz bèlt.
Pitt disarn plattform defàtte bölltma innvången un machan a nètz vo alln in trentinar un von sèlln boda abeståmmen vo trentinar boda lem in auzlånt, in Trentino un in Bleschlånt.
Disarn kamòuschaft, boda tüat offe a interesåntegez vestar afte bèlt, gemacht vo informatziongen un prodjèkte, nemmenda toal laüt pitt intersse, esperientzan un profesiongen gåntz åndarst ma boda håm allz ummaz lust zo stiana gepuntet pinn Trentino un pittar trentinar kamòuschaft.
Di plattform augelekk vodar UMS Coesione territoriale e valorizzazione del capitale sociale trentino all’estero, di struktùr boda arbatet auzolega politike un prodjèkte vodar autonome Provìntz vo Tria vor di trentinar boda lem in auzlånt un vor berda abeståmpt vo disan, iz khennt koprodjèktart pittar hilfe vodar feroine Trentinar in di Bèlt un pittar Uniong Trentinar Famildje in Auzlånt.
Innschraimse aftz https://mondotrentinovillage.it/ iz dèstar. ’Z iz genumma inngem soin nåm, zuarnåm, zornìrn soin profil un vennense pitt alln in laüt boda håm genump toal in “Mondo Trentino Village”.
Übarsetzt von Schaltarle vor di zung von Toalkamou vodar Zimbar Hoachebene
