Traduzione in mòcheno

Zòmmtrèff van Minderhaitn: s vòngen u’ en Trentin de programm af taitsch va de osterraichtelebision ORF

Der hòt se gahòlten en nomitto va de 3 van schanmikeal en Trentinersol van sitz va de Provinz der 37^ Zòmmtrèff van Minderhaitn, vourgahòlten van provinzalasesor en de lear, en de universitet ont en de kultur ont zòmm pet de viareren van Dinst ver de lokal sprochminderhaitn ont ver en europeische audit va de Autonome Provinz va Trea’t. En vèrrekaitnetz de dersteller van ladiner, van bersntoler ont van zimber minderhaitgamoa’schòftn.
En petrèff van to, abia as stea’ de dinger va de minderhaitnochricht en telebision ont en de radio, derno van switch-off van TML van hourneng 2022, as enviretrong hòt de programm iber de lokal gschichtlige sprochminderhaitn.
En a kurza zait men bart sechen meing en Trentin de sendern ORF 1 ont ORF Sport: der earste, generalist, versichert za lòng sechen “Südtirol heute” ont de nochrichtn va enteress af taitsch, en guat va de taitschminderhaitn; der zboate, as ist an sender iber en de bichtestn sportivkompetizionen, va de bèlt aa, ist a hilf za lòng pesser kennen der sport ont de taitsch sproch zbischn de trentiner.
Dòs avai de gasetzn as schitzn de gschichtlegen sprochminderhaitn song as versichert ist s rècht za hom nochrichtn, tschrim ont audiovisuell, en de aigene sproch van an iata gamoa’schòft en sai’na lender, ont as men versichern miast turch de radiotelebisionen programm, der unterstitz van kulturalkaraktern van ladiner, van bersntoler ont van zimber. No en doi be ist u’ganommen kemmen de gamiaset vourtschbinn, nèt verpuntlech, van Zòmmtrèff van Minderhaitn ver za trong envire a zòmmpint pet El Towers, as ist de oa’zege as prauchen mu de frequenzn ver en Trentin Sudtirol, pet en beil as bider baitergem kimmp der osterraicher sender ORF en de platz bou as de taischminderhaitn sai’ ont en de gònze Provinz aa.