Di plètz boma mage machah in zivìl Dianst soin a pizzle bobrall in di lentar vodar Provìntz. Di mearastn soin ka Tria (39) un in Vallagarina (21) ma ’z soindara o atz Ala, in di Burge, a Cles, Pèrsan, Piana Rotaliana, Valle dei laghi
un no åndre lentar o. ’Z soinda 67 prodjèkte boda innhaltn zbölf månat; 5 prodjèkte vo sèks månat; 3 prodjèkte vo drai månat.
Da soin mearare di séktör boma mage soin ågestèllt: umbèlt, animaziong, hilfe, komunikatziong un tèknolodjìe, kultùr, edukatziong, spòrt un turismo. Vor aniaglan prodjèkt afte websait venntma a skèda pinn date bomase mak meldn, dar briav boda zoaget in prodjèkt saiz gåntz saiz lai khurtz geschribet boda auroatet lai di bichtegarstn elementn von sèll boz bart soin di arbat zo macha. Pezzar iz vorsan garade bia un baz in organizatziongen boda machan in prodjèkt boda håm a mentsch gelekk apòsta zo rispundra aftz allz daz sèll boda iz zo mocha bizzan.
Ma bart mochan machan op un zua 30 urn afte boch, gezalt 600 euro aftn månat. Ma makse kandidàrn lai vor an uantzegen prodjèkt.
’Z Åmt vor in zivìl Dianst vodar provìntz lekk au, vor di laüt boda soin interesàrt, a drai trèff zo macha vorstian pezzar bazzez iz. Aniagladar trèff gitt di informatziongen boda soin mångl zo maga zornìrn in prodjèkt boda gevallt mearar un bia zo macha in pruf z’soina inngenump. Ma bart ren von sèll boz iz dar zivil Dianst, bia ’z khinta gemacht a prodjèkt, bia ma mochten lesan, bia ma zornìrten, un baz ’z khinta gevorst in sèlln bodase kandidarn zo machanen un no vil åndarst. Alle di trèff bartnse haltn online: zo venna di kredentziàln innzogiana iz genumma gian afte websait SCUP.
Di tang un di urn von trèff soinz dise da untar:
an menta 15 abrèl di zboa in tages
an fintzta 18 abrèl di noüne abas
an erta 23 abrèl di uleve vor mittartage
Zo bizzasan mearar übar in zivìl Dianst, zo bizza bazma hatt mångl zo nemma toal un zo haba a hånt innzoschraibase iz möglich vorsan in Åmt vor in zivil Dianst vodar Provìntz in bege Grazioli 1 ka Tria;
email: uff.serviziocivile@provincia.tn.it; tel. 0461 493 100.
Djeneràl Info übar in zivìl Dianst: www.serviziocivile.provinca.tn.it/
Bia innzoschraibese aftn SCUP: https://serviziocivile.provincia.tn.it/Adesione%23iscriviti
Z’ di prodjèkte auzgètt: https://serviziocivile.provincia.tn.it/Progetti/(filter)/Progetti%2520SCUP_PAT
'Z iz nützlich stian nå dar sait Facebook "WeSCUP il servizio civile trentino" un Instagram #SCUPTrento.
Übarsetzt von Schaltarle vor di zung von Toalkamou vodar Zimbar Hoachebene
