Traduzione in cimbro
"Zimbarboch", ’z hefta å ka Tria da earst boch vodar zimbar kultùr
Ma venntze in di haupstatt åhevante von 20 sin atz 24 von bintmånat. Dar earst trèff an menta di sèkse in tages
A realtét vodar ünsarn Provìntz boda iz a schatz vor alle: da zimbar zungmindarhait bill håm soin ruòl un billen machan varlérn un asó khinta augelekk a initziatìf, offe alln, zo macha khennen vo nåmpum soi kultùr un da starch pintom zbisnen mentsch un natùr bodase auznimp vo alln in åndarn.
Von 20 sin atz 24 von bintmånat, defatte, bartze haltn di Zimbarboch, da earst boch lai vor da zimbar zungmindarhait boda khint gemacht in di haupstatt, dar zentrum von sotziàl un kulturàl lem vodar trentinar kamòuschaft.
Åhevante von tèma zo leba pittnåndar mentsch un vichar, boda bartn nemmen toal bichtege laüt vodar akadèmische un etnografische bèlt, sin atz bèrkhstattn vor groaze un khlummane übar di fabln vodar zimbar traditziong, di Zimabarboch bart sopin an okasiong zo khenna a zung un a kultùr boda magat gian palle zo vorlìarase, a kultùr boda iz asó nåmp üsåndarn ma boda nonent iz gekhennt genumma. Dar earst trèff boda bart khemmen khött baz ma bart tüan, bartze haltn an menta atz 20 von bintmånat, di sèkse in tages in puachgeschèft Ancora ("Artigianelli") in bege Santa Croce, 35 ka Tria.
Di boch iz augelekk von Toalkamòu vodar Zimbar Hoachebene un von Kulturinstitut pittnåndar pinn Kamòu vo Lusérn un pinn Dianst vor di Zungmindarhaitn vodar Provìntz.
In trèff von menta bartnda nemmen toal dar vorsitzar von Taolkamòu vodar Zimbar Hoachebene Isacco Corradi, dar dirèktór von Kulturinstitut Lusérn Willy Nicolussi Paolaz, dar vortretar vodar Autority von zungmindarhaitn Matteo Nicolussi Castellan un dar vüarar von Schaltarle vor di Zung von Toalkamòu vodar Zimbar Hoachebene Andrea Nicolussi Golo.
Di kolège djornalìstn soin inngeladet.
Gekhluppet: dar progråmm
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
