
Endèna la scontrèda l é stat sotrissà l’emportanza, do che l é stat serà per trei egn, de averjer endodanef i ujes del Zenter Traumatologich, con senta te San Giovanni di Fassa/Sèn Jan, apontin per ge arsegurèr sie servijes a Fascia, emportanc mascimamenter via per la sajon da d’invern. “Saon ben – à dit l assessor Tonina – tant che sie debesegn per chi che vif sa mont aer n azes asvelt e diret ai servijes sanitères, mascima via per l invern, canche l é sacotenc ghesć te val: l é fondamentèl, per nosc sistem de azet, dèr responetes segures e sun chest l é stat e sarà semper ence tel davegnir l empegn tant da man mia che da man de la strutura. Ades ge vel però troèr fora 4 posć let per arsegurèr la prejenza de infermieres e tecnics de radiologia. A chesta partira cognon jièr dessema, istituzions e teritorie: son defat spervajo che demò ensema podaron troèr fora na soluzion che ne dae l met de renforzèr nesc servijes e responer ai besegnes de chi che vif e laora te chesa valèdes”, l à dit amò l assessor provinzièl col se oujer ai aministradores dal post.
Endèna la scontrèda l é stat rejonà ence de la “Cèsa de la sanità” che troarà post semper te San Giovanni di Fassa/Sèn Jan, servije preziuos per per chel che vèrda la medejina teritorièla: “Se trata de na costion che me prem – l à dit tinultima l assessor Tonina-. La Cèses de la Sanità sarà n element fondamentèl per l davegnir de la sanità de nosc teritorie, conscidrà che les sporjarà servijes apede ai sentadins, col smendrèr la distanzes e arsegurèr a chesta vida cures spedientes e integrèdes. L é apontin su chesta vejinanza che volon seghitèr a lurèr, percheche pisson che na comunanza forta e a una sie l sedim sun chel che se pel meter en pe n sistem sanitèr percacent e uman. Sion chiò per vo, per scutèr vesc besegnes e per dèr responetes concretes. Dessema, podon meter a jir na sanità che mete al prum post la persona, renforzan l leam anter l teritorie e i servijes”.
L procurador Detomas, tel sporjer sie develpai “no formal” al assessor Tonina e a l’Azienda sanitèra, l se a dit content “percheche do 3 egn che l Zenter no à lurà, la Provinzia la é stata bona de se dèr ju e garantir n servije prezious per la comunanza e essenzièl per la perferida turistica”.
Traduzion di Servijes Linguistics e Culturèi del Comun general de Fascia