Giovedì, 07 Ottobre 2021 - 09:05 Comunicato 2769

Traduzione in cimbro
Vüchtzekh djar von zboate Statùtt vo Autonomì, an båndo vor di djungen trentinar kunstlar

Di vorsch vor atz 31 bimmat 2021

An öffentlesche båndo zo schupfa zo haba an schütz pitt gèlt vor di djungen trentinar kunstlar un kunst organisatziongen boda soin augelekk daz mearaste vo trentinar kunstlar odar boda håm soin setz in Trentino, ditza zo macha kulturàl prodjèkte übar in tèma von vüchtzekh djar von zboate Statùtt vo Autonomì: da provintziàl Djunta hattz ågenump, in sitz von vraita in earst von bimmat, vürgelekk von asesór vor di schual, di universitét un di kultùr, legante untar 140 tausankh euro vor intziatìvan boda ågian tetatro, musìk, tåntz, cinema, video un åndre kunst.
’Z iz dar earst båndo boda ånimp in artìkl 28 bis von provintziàl gesetz übar di kulturàln arbatn un boda ågeat garade in sèlln prodjèkte übar in vüchtzekh djar sidar azta iz khent ågenump dar zboate Statùtt vo Autonomì, a båndo boma gloabet azzar mage khemmen bidar augelekk vorz djar 2022 o. Dar vèrt vo disarn gelånghait iz ke ma haltet di naüng djeneratziongen nèt lai azpe nützar ma azpe sèlbart vürlegar vo kulturàl prodjèkte, disan stroach pitt initziatìvan boda mang machan khennen di stòrdja vodar trentinar kamòuschaft un daz earst vo allz vodar Autonomì. Di vorsch zo haba in schütz mang khemmen ingètt vor atz 31 bimmat 2021 in Dianst vor di kulturàl arbatn.

Haltante kunt von vil kulturàl sachandarn boda khemmen vürgelekk von båndo, zo schètza di kunst prodjèkte izta khent augelekk a khnopf boda bart arbatn åna z’soina gezalt un iz gemacht von diridjént von Dianst vor di kulturàl arbatn vodar autonome Provìntz vo Tria Claudio Martinelli, von dirèktor von Kulturàl Dianst Zentrum S. Chiara Francesco Nardelli, von funtzionàr von Museo Modérn Kunst Gabriele Lorenzoni, dar zuarhaltar vodar Trentino Film Comission Luca Ferrario, di vortretar vodar Stiftung Museo Storico Sara Zanatta un vor in Komitàtt vor di vüchtzekh djar von zboate Statùtt vo Autonomì Elisa Bertò.

Übarsetzt von Schaltarle vor di zung von Toalkamou vodar Zimbar Hoachebene
(Traduzione a cura dello Sportello linguistico della Magnifica Comunità degli Altipiani Cimbri)

(cdt)


Immagini