Haltante kunt von groaz didaktik-edukatìf vèrt boda håm di klasse pitt dupplzung, daz guat boda iz khent khött übar ditza von schual diridjéntn un von schual istitutziongen boda soin khent inngevånk in prodjèkt, darzuar in guat boz gitt lirnen a zung vo djüngom au un di bölle vodar autonome Provìntz vo Tria un von Land Tiról zo giana vürsnen z’arbata pittnåndar asó azpeda sa khint getånt zbisnen in schaul sistème von zboa lentar, dar provedimént ågenump bill machan vürgian di sektziongen von schualn pitt dupplzung durch progrémm gemacht pittnåndar zbisnen Tria un Innsbruck.
Dar protokòll, augelekk ’z djar 2005 besteteget in Schualinstitut Trento 2 vo Cognola azpe schual boda vürvüart in prodjèkt. Di maistre inngevånk soin sèkse vor lånt. Daz naüge inngevüart haür iz daz ke di maistre boda arbatn aftz disan prodjèkt mang stian daz lengarste ume di viar djar, in Land Tiról.
Di trentinar maistre boda gian z’arbata vor a zait in Tiról mang asó lirnen pezzar di zung, un vorstìan mearar di kultùr vo disan lånt un lem a raicha arbat esperientz segante bazta tüan di åndarn. Balsa khearn bidrùmm in Trentino dise maistre mang zoang un abegem in kolège di kompetentzan bosa sèlbart håm gelirnt, machane asó khemmen in prodjèkt a strumént boda helf “abezolirna berda lirnt” in an européan prospektìf, sichrante an edukatìf sistèm pittnar hoachan qualitét, gegruntet aftz mearare metode un didaktike, inklusìf un inovatìf.
Übarsetzt von Schaltarle vor di zung von Toalkamou vodar Zimbar Hoachebene
