La sorastanta l’à metù al luster i joegn touc ite dal projet che i passarà na setemèna rica te val de Fiem dessema con ensegnanc de nonzech internazionèl e che i vivrà na esperienza per crescer de gra al bal che ge dèsc l met, a chi che i lo pratega, de troèr sie balanzament, aer maor segureza e saer se mever te la sozietà entorcolèda de anchecondì.
Do aer fat festa l an passà per i vint egn, chesta vinteuneisema edizion la va inant con sia “mission” col portèr dant na formula che la se à desmostrà de fazion. Na setemèna piena de lezions retes da dozenc e coreografes profescionisć de nonzech nazionèl e internazionèl outes ai arlieves de bal de duta la età, amatorièi e profescionisć, che i à l’ocajion de studièr la desvaliva tecniches de bal. Ensema a la formazion Trentino Danza Estate met dant desvaliva seres de spetacoi che i vegnarà porté dant tel Teater de Comun de Tieser e a la fin del event, tel Zenter Congresc de Ciavaleis. Se pea via co la domenia ai 27 de aost co la Sera de Benvegnù, olache, apede a la prejentazion ofizièla del staff e di dozenc, dotrei scoles de bal les portarà dant sie spetacol. En mèrtesc ai 29 de aost tel Teater de Comun de Tieser la compagnia de bal “I(l)limitati” col spetacol “Geometrie di Vita”. Per l projet Theaterbox en mercol ai 30 de aost, semper tel Teater de Comun de Tieser, vegnarà portà dant trei spetacoi de bal contemporan, più avisa “Born in Captivity” de Daniele Ziglioli, “Across the level” de Alberta Palmisano e l spetacol de la compagnia “Le Gorghe” de Vigo Meano che à inom “E qui (librio) vivo” de Federica Costantini. Ghesć de onor de la sera de en mercol ai 30 de aost, i doi balarins de la Fondazion Arena de Verona Elisa Cipriani e Luca Condello, che i portarà dant vèlch bal de cobia tout fora da sie repertorie.
No podea mencèr nience chest an la sera dedichèda al Contest de Hip Hop endrezà da MAD 4 Dance de Fabrizio Santi, che l vegnarà fat semper tel Teater de Comun de Tieser en jebia ai 31 de aost. Via per la setemèna de lezions vegnarà dat fora ence Stipendium per i arlieves più meritevoi.
L grop de ensegnanc l é metù adum da Gianluca Ferrato per l Musical, Michel Cassan e Caterina Felicioni per l Bal Modern, per l Hip Hop tolarà pèrt N.Ough donca Alessandro Steri e Filippo Ranaldi, e Patrick Ang. Per l bal contemporan tolarà pèrt ence te chesta edizion Daniele Ziglioli enveze chest an Barbara Protti, che la rejarà l cors de bal classich de livel mesan, la portarà a Tieser ence l Bal de Carater. Chest an, apede ic, se à jontà ite trei neves dozenc, anter chisc Alessandro Grillo, che l é stat Prum Balarin del Teater a la Scala de Milan che l tolarà pèrt a Tde 2023 desche ensegnant de Bal Classich de livel mesan e aut. Samuel Puggioni sarà enveze l nef ensegnant de bal acrobatich, enveze Isabel Nardelli rejarà l cors de dancehall. Sarà ic, dessema ai ensegnanc che à jà tout pèrt a la autra edizions, de chi che cognoscion l cunst e la gran profescionalità, a ge dèr nef sbunf a duc i arlieves che passarà chesta setemèna de studie e de aprofondiment de la tecniches de bal, ma ence de barat de esperienzes e de spas, de gra a la seres de spetacol endrezèdes tel Teater de Comun de Tieser.
Trentino Danza Estate, ret per la pèrt artistica dai diretores Paolo Golser e Donatella Zampiero e per chela tecnica e de endrez da Licia Deflorian e Flavio Delvai, l met dant per chesta edizion 23 corsc de bal che vegnarà metui a jir da en lunesc a en vender, enveze en sabeda ai 2 de setember vegn endrezà desche zenza la Sera Finèla a Ciavaleis, olache, en ocajion del event per la fin di corsc, duc i arlieves e i ensegnanc i portarà dant sie spetacol.
No menciarà desche zenza i spetacoi per deletèr l publich.
Informazions e program: http://www.trentinodanzaestate.it/
Chiò l link per desćiarièr l material video:
Traduzion di Servijes Linguistics e Culturèi del Comun General de Fascia
