De provinzal schlesser
Der summer van provinzal schlesser bart abia òlbe bolten raicht va naiekaitn sai’, nèt lait ver kunst ober ver de konzertn, ver de vourstelln, ver en offet kino, ver de storische gadenk, ver de falkner vourstelln. Viara de ausstelln za nèt verliarn. Kan Castello van Buonconsiglio “I volti della sapienza. Dosso e Battista Dossi nella Biblioteca di Bernardo Cles” as men kònnt sechen van 1 van heibeger finz as de 22 van schanmikeal 2023. A groasa moglechkait za sechen de zbelf holztovln, gònz ausgarichtn, gamolt zbischn der 1531/2 van priader Dosso ont Battista ver de derr va de bibliotek van Magno Palazzo van prinz pischof Cles. òlbe en Castello van Buonconsiglio finz en 1° va schanmikeal bart men meing pasuachen de ausstell “Sergio Perdomi (1887-1935). Il fotografo della Venezia Tridentina” bou as Perdomi ist gadenkt abia “der letrater van monumentn, van kunstòrbetn, van schea’ va de natur, van haiser va de region”. Kan Castel Caldes finz as de 5 van òlderhaileng bart men meing sechen de ausstell ver en Bartolomeo Bezzi, bail en Castel Stenico finz as de 8 van schanmikeal ist de ausstell ver en Giappone.
Muse
An summer storch zeichena. Ver de sai’na earstn 10 jor, der MUSE paroatet se ver a groasa fest va gebursto: en sònsta as 22 van heibeger, va um 4 zobenz finz um 3 en de vria, en museum ont en ausergortn bart s hom mear as 10 stunnen va talk, labor, vourstelln ont konzertn as leing se zòmm pet de sprochen va bisskait ont art ( do der gònz program: https://www.muse.it/events/dieci-anni-di-muse/). Vil de ausstelln as men bart tea’: “Wild City. Storie di natura urbana”, finz as de 5 van òlderhaileng 2023, schauk de mander ont de billbèlt en lònt; “Deserto Italia”, finz as de 20 van agst 2023, derzeilt pet de letratn van Stefano Torrione de beateger as hòt trong s bètter en de balschumbèlt; “Anima Mundi. La giostra della vita”, van 13 van heibeger finz as de 29 van schanmikeal kan Palazzo delle Albere, ist a roas as de ro van lem.
De energi van gebursto lòk se aus gor en de ourtsitzn. Der Museo van Palafitte van Sea va Ledro, ver en summer, mòcht regiarata pasuachen ont labor ont an sprung en lem va vour 4 taustn jor. Der Museo Geologico van Dolomiti va Predazz, bòlket as de pèrng pahalter van UNESCO, lont inn za suachen de fossiln ont de minerai, ober gor de gschicht va Toby ont van rinoceronti, de hoaklegen gigantn va de Eart, pet de ausstell “L’ombra dell’unicorno”. En Giardino Botanico Alpino ont as de Terrazza delle Stelle, en lòch van Viote asn Bondon, tuat men trittln en bòlt ont schaung de stern unter oa’n van himbln scheanest va de Europa.
Mart
Kan Mart va Rovereto geat envir finz af de 27 van agest de groas ausstell Klimt e l’arte italiana, schoa’ pasuacht va mear abia 60 tausnt lait. Af de 16 van heibeger vonk u’ de ausstell af de kamaròttschòft zbischn zboa groasa artistn van vourder jorhundert: Leonor Fini ont Fabrizio Clerici. En glaiche to tuat au de ausstell van mografian af de moler Aurelio Bulzatti ont Stefano Di Stasio ont van focus iber Mario Reviglione ont Alcide Ticò.
Pet en kartl van Mart geat men aninn en Casa Depero ont en de Galleria Civica di Trento aa, bou as ist de ausstell Domus Contemporanea.
Fondazione Museo storico del Trentino
Vil de vourschlogn va de Fondazione Museo storico van Trentin ver en doi summer. En de Gallerie va Trea’t mu men pasuachen “Spettacolo” en schbòrz sol ont mearera ausstell en bais sol zbischn de beiln “Alps. Comprendere la montagna” ont “Cento anni dell’Aeronautica Militare”. En Museo Caproni òll pfinsta nomitto s ist moglech prauchen drai vludersimulatorn (zboa SPAD ont an Cessna) ont toalnemmen a’ne zoln en a viarung. Za vinnen en greaser òllgamoa’gortn va Trea’t de ausstell “Gocciadoro: cento anni di un parco romantico” as men òll to pasuachen mu. Za vergèssn nèt sai’ de summeroffen van Forte Cadine: van ma’ta en sunta va um 10 finz um 18.
METS-Museo etnografico trentino San Michele
Der kultursummer van METS-Museo etnografico trentino San Michele hòt organisiart gor “Acqua malto luppolo e lievito: incontri fra degustazione e cultura”. A roas multisensorial bou as s trentiner piar der netz kimmp zbischn tròcht, naikait ont hòntbèrkvrait. Òll mitta va heibeger ont agest va um 17:30, ausòndra naikaitn bou as s èsskostn zòmmpintet se pet de kultur, de kunst ont s kennen, vrischa moglechkaitn za kostn piar va qualitet, asou za kemmen za kennen de sekretn va abia as s gamòcht kimmp, bail en ausklòffen se va auskennlait ont viatlait. Der inntritt ist vrai ont a’ne kostn.
Kulturalpahalter ont trentine archeologi
Pet de innbaich va de Villa romana di Orfeo en Trea’t vònk u’ der lònk ont lebet summer va de trentiner archeologi, raich va naikaitn ver de lait van òlla de elt. Van prochet en leistagest s hòt mear va 150 trèffen organisiart kan Museo delle Palafitte ont kan Parco Archeo Natura di Fiavé, kan Museo Retico di Sanzeno, en Tridentum romana ont en òndra platz van Trentin. Archeologi za lòng schaung, òrbetn ver kinder ont groasa, viarungen, archeotrekking, teaterschauspiln, lesn, musik, vourstell va piacher ont trittln pet auskennlait barn raicha moglechkaitn sai’n ver za kennen, pet spil, de elter gschicht van lònt zòmm pet de archeologi.
Men mu sechen der gònze programm af de sait https://www.cultura.trentino.it/Temi/Archeologia.
Ont va de 23 van agest finz af de earstn van schanmikeal der Festival “I Suoni delle Dolomiti”
Der klender van doi mol schlok vour 17 trèffen af de trentiner Dolomitn, en platz as de lait za vuas raichen ont de musiker aa as spiln klassische musik, jazz, autormusik va world music ont musikteater. Ver za vinnen zòmm en de kunstler de platz van pèrg as se paroatn en herbest ont as kennen vòrm ont lòntschòftn schenken as en bea’ne òndra momentn van jor za sechen sai’.
Nochrichtn avn programm: www.visittrentino.info/isuonidelledolomiti
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
