Chesta scontrèda la se jonta a cheles jà fates co la autra Unions distretuèles, con chela de se confrontèr dintornvia la situazion e i argomenc de anchecondì per l setor e per vigni Grop.
Anter i desferenc argomenc rejoné fora endèna la scontrèda ge è stat dat gran emportanza a la formazion di operatores, con proponetes prezises per chel che vèrda i contegnui e la modalitèdes per la meter a jir, acioche la sie semper aldò di besegnes di studafech. Se à rejonà ence de telecomunicazions, radio TETRA e chieripersones, del numer vert per la chiamèdes de emergenza metù a jir tel Primier, de la lizenzes de vidèr de servije, de la vijites mediches del personal, di intervenc sa mont e di mesi che ge vel durèr, de la segnalazions de situazions de pericol e i protocoi operatives per la ativitèdes che tol ite sogec desferenc o l raion de la Provinzia autonoma de Busan, de arsegurazions, de responsabilità di comandanc e di gradué e de sia spezifica formazion tel ciamp organisatif e aministratif e amò apede de la prozedures de revijion di mesi en dotazion.
Endèna la scontrèda l é stat rejonà ence de co endrezer i pians de intervent per i locai sa mont via per la sajon da d’invern; argoment che ge volarà amò vardèr fora per miorèr la percacenza operativa e la segureza de chi che va sa mont.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
