“A Ala l é gran biteboi, sion do che speton con gaissa la dì dai 13 de mé. Ge die develpai al president Fugatti e al Euregio per ne aer cernù fora desche senta per la festa, sarà na ocajion per portèr dant la potenzialitèdes e la marevees de noscia zitadina: l program tol ite sacotanta realtèdes de noscia sozietà, i joegn, ma ence duta la autra fasces de età; tras Ala se arà l met de fèr cognoscer l Euregio e la politiches valives di trei raions “, l à dit l ombolt Soini.
La dì scomenzarà co la scontrèdes istituzionèles de la trenteisema sentèda de la Jonta del GECT Euregio Tirol-Sudtirol-Trentin alò da Palaz Pizzini e la vintecincheisema sentèda de la Assemblea del medemo GECT, coi raprejentanc di trei raions, avisa i trei presidenc.
Ai 13 de mé del 2023, estra apede sarà la Dì de la mobilità del Euregio, na ocajion per ruèr a na vida sostenibola a la festa a Ala, che ge vegn dit “Zità de velù”, rica de palac storics e tradizions.
L program l perveit defilèdes di Schützen e de la Museghes di trei raions, conzerc, marcé, laboratories per bec, vijites compagnèdes ti palac de Ala, degustazions te la enoteca de Euregio e speises gastronomiches da duta l’Euroregion.
Chisc i apuntamenc:
Da les diesc da doman: Vegn orì i marcé de roba da brac e eno-gastronomics del Euregio – Palaz Taddei e corti
Da le undesc en chèrt: Scomenza la defilèda di gropes tradizionèi e de la autoritèdes del Euregio – Parch Bastie
Da trei chèrc da les doudesc: Rua la defilèda te piaza San Giovanni, vegn fat la zerimonia ofizièla e l benvegnù tradizionèl. La musega de Wilten sonarà l toch de musega del Euregio
Dal mesdì: Vegn orì l “Restorant del Euregio” con speises di trei raions – Parch Bastie e l’ “Enoteca del Euregio” con prejentazion e degustazion de vins di trei raions – Palaz Scherer
Da la does domesdì: Vijites compagnèdes con animazion di figuranc de la Sociazion Vellutai. Orarie vijites: da la does e da les cater domesdì, da les sie da sera. Se se bina te Piaza San Giovanni diesc menuc dant che scomenze ogne vijita che l’arà na regnèda de presciapech 90 menuc.
Da mesa les trei: Enaudazion de la tabela a recort de Andreas Hofer tel chèder del projet “1809: sul troi de Andreaz Hofer” a chela che tolarà pèrt i trei Presidenc del Euregio – Cort de Palaz Taddei
Da les trei domesdì Conzert de la Musega de Wilten – Piaza San Giovanni
Da les trei domesdì: Laboratories per i bec “da schiussèna a seida” – i bec i cognosc la desvaliva fases del zicle de la seta. Oraries laboratories: da les trei domesdì e da mesa les cinch domesdì. Ensciunuazions sul post- Parch Pizzini (tel cajo de catitemp l’atività la vegnarà metuda a jir tel pian ite dret de Palaz Pizzini)
Da les trei domesdì: Conzert di cores del Euregio – Cort de Palaz Taddei
Da mesa les cater: Prejentazion del liber “Dittature di confine” per endrez de Lorenzo Gardumi e Anselmo Vilardi tolarà pèrt i trei Presidenc del Euregio – Palaz Pizzini
Da les cinch da sera: "L’Euregio secondo Messner - A colloquio con il Re degli Ottomila". Farà da moderator l capo ofize stampa de la Provinzia autonoma de Trent Giampaolo Pedrotti – Teater de Ala
Da mesa les nef da sera: Conzert di gropes de musega del Euregio – La pèrt più bela de Upload – Piaza San Giovanni, coi Rebel Roots, i Cannibali Commestibili, Bianca e Baiba
Da mesa les nef da sera: Conzert de l’Orchestra Haydn – se pel ite debant enscin a che sarà posć a la leta – Teater de Ala
Autra informazions su www.euregio.info/festa
Chiò enjontà: program e mapa
Fotoservije e imagines per endrez del Ofize Stampa
Download imagines chiò: https://bit.ly/3nqP0Rb
Traduzion di Servijes Linguistics e Culturèi del Comun general de Fascia
