Lunedì, 22 Aprile 2024 - 15:52 Comunicato 889

Traduzione in ladino
Servije zivil, l é a la leta 75 projec neves per 124 joegn

[Ladino] L é averta la seconda sescion, sun cater che vegnarà metù a jir fora per chest an, per poder cerner anter la proponetes del Servije zivil universèl provinzièl. Pel se enscinuèr, e vegnir cernui fora per un di 75 projec orì, joegn anter i 18 e i 29 egn no amò fac, per 124 posć a la leta. L termin l é stabilii a na vida autonoma da ogne projet, aboncont dant che sie fora i 3 de mé, enveze duc i projec i scomenzarà en sabeda 1m de jugn.
Per la vizepresidenta de la Provinzia e assessora a l’istruzion, cultura e sport, politiches per la familia, per i joegn e per la medema oportunitèdes anter om e femena, tor pèrt al Servije zivil vel dir se dèr ju te n contest operatif concret, tor su competenzes da poder durèr tel mond del lurier, doventèr gregn e sentadins responsaboi. La vizepresidenta la envia duc i joegn a jir su la piata internet del projet per troèr fora, anter la tropa proponetes, chela che più confèsc a sie esser e a sia capazitèdes: l sevije zivil provinzièl l é per i joegn na oportunità per se fèr ite tel mond del lurier tras contesć e projec zertifiché dai ofizies provinzièi de competenza e donca con n profil muie ascort per chel che revèrda la reèles e concretes possibilitèdes sportes da la desferenta organisazions. Unfat, Scup ge dèsc l met ai joegn de cognoscer ence neves setores de enteres e de cognoscer cheche più ge confèsc e ge pièsc. Per chesta rejons la vizepresidenta la engaissa i joegn a tor pèrt a chest projet.

La sentes olache vegnarà endrezé i projec les é sun dut l raion de la Provinzia. La maor pèrt a Trent (39) e te Vallagarina (21), ma l é posć ence a Ala, Borgo, Cles, Perjen, te la Piana Rotaliana, te la Valle dei Laghi e te autres lesc del raion provinzièl. L é 67 projec per doudesc meisc alalongia; 5 projec per sie meisc e 3 projec per trei meisc.

Desferenc i setores olache se pel lurèr: ambient, animazion, didament, comunicazion e tecnologies, cultura, educazion e formazion, sport e turism. Per ogne projet l é sul sit n formulèr coi contac, l document entriech del projet e l document de sintesa, olache l é na sumèda de la informazions de utol de la perferida. Vegn conseà de tor contat co la organisazions che porta dant l projet, che les met a la leta na persona per dèr duta la informazions e schiarimenc. L’orarie de lurier l é en media de 30 ores en setemèna, aldò de en paament de 600 euro al meis. Se pel se ensciuèr demò a un projet.

L Ofize Servije zivil de la Provinzia l é a la leta per scontrèdes de informazion per chi che à enteres. Ogne scontrèda la dèsc l met de tor su informazions per poder cerner l projet e per portèr dant l ejam a ousc per la valutazion de la competenzes. Se rejonarà de che che l é l Servije zivil, coche l é fat n projet, coche ge vel l lejer, coche se l cern, che che ge vegn domanà a chiche vel tor pèrt e trop auter. Duta la scontrèdes les vegnarà fates online: per tor i codesc de azes ge vel jir sul sit SCUP.

I dis e i oraries de la scontrèdes l é chisc:

En lunesc ai 15 de oril, da la 14:00

En jebia ai 18 de oril, da les 21:00

En mèrtesc ai 23 de oril, da les 11:00

Per più informazions en cont al Servije zivil, ai requisic che ocor per poder tor pèrt e per didament per se enscinuèr, se pel se oujer al Ofize Servije zivil de le Provinzia te via Grazioli, 1, a Trent; Mail: uff.serviziocivile@provincia.tn.it;
Tel: 0461 493 100.

Informazions en cont al servije zivil: www.serviziocivile.provincia.tn.it/

Per entener co se enscinuèr a SCUP: https://serviziocivile.provincia.tn.it/Adesione%23iscriviti

Per veder duc i projec a la leta: https://serviziocivile.provincia.tn.it/Progetti/(filter)/Progetti%2520SCUP_PAT

L é de utol ence jir a veder la piata Facebook “WeSCUP il servizio civile trentino" e Instagram #SCUPTrento.

Traduzion di Servijes Linguistics e Culturèi del Comun general de Fascia
 

(cdt)

Fonte: Ufficio Stampa

Versione Stampabile

Immagini

Visualizza

Potrebbero interessarti: