I detaes del nef endrez i é stac porté dant dal diretor generèl f.f. de l’Apss, Antonio Ferro, dal diretor del Servije de ospedèl provinzièl de Apss, Pier Paolo Benetollo, dal diretor f.f. per l’Integrazion sozio sanitèra de Apss, Gino Gobber, estra che dal sorastant generèl del Partiment sanità e politiches sozièles de la Provinzia, Giancarlo Ruscitti.
Più avisa, l model nef de endrez aziendèl l vel renforzèr la ativitèdes teritorièles col se meter dant cater obietives prinzipai: l tor a cèria i utenc, per ge arsegurèr n percors de cura più stabol e uman; na perferida di servijes sanitères valiva per duc sun dut l raion provinzièl; semplificazion e sparpagnament sul teritorie di prozesc dezijionèi, ence tras l potenziament e l’inovazion di servijes, tras la doura de neva tecnologies per favorir la comunicazion anter profescionisć, estra che l svilup de l’informatisazion di sistemes de gestion e l sostegn di percorsc de enrescida e de formazion a do a do di operatores.
L argoment prinzipal, l à sotrissà l diretor Ferro, l é la valorisazion de la ativitèdes sanitères sul teritorie e la azions de prevenzion e de promozion de la sanità. Per chesta rejon se se metarà dant de troèr aleanzes con dotores, dotores di bec e profescionisć sanitères e sozio-sanitères, estra che con i raprejentanc di sentadins e la pèrts sozièles.
L comissarie de la Comunità de Fiem, Giovanni Zanon, l à envià via dapò n debatit, a chel che à tout pèrt ence l procurador del Comun general de Fascia, Giuseppe Detomas e l ombolt de Giovo Vittorio Stonfer, che l raprejentèa la Val de Cembra tel Cal. I raprejentanc istituzionèi i à metù al luster l’emportanza che à i teritories te la definizion del nef endrez, soraldut per chel che vèrda a la capazità de soscedèr gaissa, gust e enteres ti sanitères, l’emportanza del ospedèl de Ciavaleis e de la “Casa della salute”, col ge dèr luster e ge arsegurèr servijes de calità auta a duta la valèdes, tout ite cheles più dalonc dai zentres maores.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
