“Ber vinnen ens en an plòtz as an stòrchen bèrt hòt ver en Trentin ont ver de inser Autonomi, ver de gschicht, de sproch ont kultural identitet ont de ausònderhait van inser alpnlònt” hòt tsòk der Fugatti, as zòmm pet de asesorn en vraita af de 17 van merz troffen hòt der pirgermoaster, Andrea Fontanari, ont de junta van Oachpèrg, ont de pirgemoastern van tol, Franco Moar (Palai en Bersntol), Luca Puecher (Garait), Lorenzo Moltrer (Vlarotz).
“Ber meing, unter en òndra òrbetn, der punkt mòchen af de sèlln as bèrt gem en riarn se. Pet en sicher sai’ - hòt derzuatsòk der president - as an nètz va ben as guat ont sicher ist an bichtegen earste punkt ist ver en verpesser va de birtschòft, van turismus ont van zòmmlem ist iberhaup ver an plòtz va pèrg”.
Vour za gea’ teaverer en de sòch, der Fugatti hòt gadenkt abia de projektn va hait arauskemmen sai’ bail de trèffen pet de viar pirgermoastern, as en a priaf en president van 2021 de òcht galeik hòt en tema van riarn se: “Va de doi zòmmòrbet , as e derkenn en de pirgermoastern van doi lònt, ist augòngen de moglechkait van Projekt Borghi, ver an envireschiam as de burzn hòt en turismus, en de pahòltlechkait, en vernaiern, en de identitet, en de umbèlt hòt”.
De doin de òrbetn as s gèlt kriang.
De sai’ vinva, ver 3.300.000 euro en gònzn, de òrbetn avn riarn se as en program sai’ pet en PNRR.
Ver de Gamoa’ va Schadurschl hòt zboa òrbetn, ver an kost va ungefer an milion va euro en gònzn: s leing en sicherkait der zentralplòtz pet en beil as men iberkeart de provinzalstros 8 (120.000 euro) ont de sticker gea’be ver za pintn Mala pet en be as geat keing en Pietra viva (888.000 euro).
Derzua sai’ de òrbetn ver za leing en sicherkait de provinzalstros 135, af de ònder sait van tol. De bart verbaitert ont gareidert kemmen en de Gamoa’ va Garait (500.000 euro) ont en de sèll va Vlarotz (499.000).
Dernem en de doin, der pau en Palai en Bersntol van an parkplòtz ver en tol pet platz ver za villn de elektresche mittln ont der rifpunkt van mittl as men vourtschbinnt abia dinst ver en hoatol (649.000 euro).
Derzua òndra òrbetn ver za leing en plòtz ont verbaitern de PS 135 ver de beiln as der Provinz zoln bart 2 milionen, asou as en gònzn iber 5 milionen spendiart kemmen barn.
Vrong gamòcht van Druckomt
Ver za nemmen aro
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
